Ձեր վստահելի աղբյուրը

«Այսօր Հայաստանում ոչ միայն եզդի գործարարների, նաև շատ գործարարների  շրջանում են լինում տարբեր տեսակի անհարթություններ, տարաձայնություններ, նաև օրենսդրական տեսանկյունից խնդիրներ: Օրենսդրական կարգավորումներով կարելի է լուծել այդ խնդիրները»,-  եզդիական համայնքի գործարարների հետ հանդիպմանն ասաց խորհրդարանական ընտրություններին ՀՀԿ-ի համապետական ցուցակով եզդիական  համայնքի կողմից առաջադրված թեկնածու, սահմանադրական իրավունքի մասնագետ Ռուստամ Մախմուդյանը:

Նա նշեց, որ անհրաժեշտ է բիզնես միջավայրը զարգացնելուն ուղղված կոնկրետ քայլեր ձեռնարկել: Միաժամանակ հավելեց, որ այդ քայլերն արդեն ձեռնարկվել են՝ Կարեն Կարապետյանի վարչապետ նշանակվելուց հետո, նրա ակտիվ մասնակցությամբ:

«Վարչապետը պատրաստակամություն է հայտնել բիզնես ծրագրերում ներգրավել մեր համայնքի գործարարներին»,- ասաց Ռուստամ Մախմուդյանը:

Դիմելով եզդի գործարարներին՝ նա նշեց, որ  խնդիրների լուծմանը հասնելու, որևէ բան փոխելու համար պետք է կանգնել քաղաքական մեծամասնություն կազմող ուժի՝ ՀՀԿ-ի կողքին:

«Ես ձեզ կարող եմ վստահեցնել, որ պատգամավոր ընտրվելուց հետո  ձեզ համար լինելու եմ հասնելի: Միայն այդ դեպքում կարող եմ տեղեկանալ ու Ազգային ժողովում  բարձրաձայնել ձեզ հուզող խնդիրների մասին: Պատրաստ եմ ցանկացած դժվարության դեպքում կանգնել ձեր կողքին, որովհետև ձեր կողքին կանգնելով՝ կանգնում ենք Հայաստանի յուրաքանչյուր քաղաքացու կողքին, նաև այդպես   նպաստում տնտեսության զարգացմանը»,- ասաց պատգամավորության թեկնածուն:

Ռուստամ Մախմուդյանի խոսքով, նախընտրական հանդիպումների ժամանակ բարձրաձայնված բոլոր հարցերը, խնդիրները գույքագրում են, բարեհաջող ավարտից հետո, հարցերի կարևորության աստիճանից ելնելով, ձեռնամուխ են լինելու դրանց լուծմանը: