Ձեր վստահելի աղբյուրը

«Մեր հանդիպումները ժողովրդի հետ եկան ասելու, որ ժողովուրդը մնացել է կոմկուսին դաշնակից»,- այսօր լրագրողների հետ հանդիպմանն ասաց ՀԿԿ ղեկավար Տաճատ Սարգսյանը՝ նշելով, որ իրենք ասել են ու ասում են, որ կոմկուսը դաշինք կկազմի միայն ժողովրդի հետ:

Ամփոփելով քարոզարշավը՝ Տաճատ Սարգսյանն ասաց. «Ամբողջ հանրապետությունը քարոզարշավի ժամանակ ոտի տակ առանք՝ հյուսիսից-հարավ, արևելքից-արևմուտք: Չեմ տեսել որևէ կուսակցության գաղափարախոսություն, որը կարող է մրցակից լինել մեր գաղափարախոսությանը, իսկ ԱԺ-ն առանց կոմունիստների գաղափարախոսության` թերի է, ընդունած օրենքներն էլ են թերի»:

Նրա խոսքով՝ իրենց ծրագիրը բխում է հանրապետության ծանր վիճակից և ծառայելու է այդ վիճակից հանելուն:

«Մենք ոչ տուրիզմով կարող ենք հանրապետությունը փրկել, ոչ էլ սպասարկման այլ որոտով: Մեզ պետք է ունենալ հզոր արդյունաբերություն, գիտություն, ցավոք իշխանություններն այսօր այդ խնդիրը չեն կարողանում լուծել: Պետությունը պարտավոր է օրենքի ուժով հետ վերցնել խորհրդային տարիների արտադրության շինությունները, որոնք այսօր դարձել են սպասարկման օբյեկտներ և դրանք կրկին ծառայեցնել նպատակին»,- ասաց կոմկուսի ղեկավարը:

Տաճատ Սարգսյանի կարծիքով, նոր Ընտրական օրենսգիրքն ավելի մեծ հնարավորություններ է տալիս՝ ընտրություններն ավելի արդար անցկացնելու. «Մենք հավատում ենք, որ ժողովուրդն իր ձայնը մեզ կտա: Սակայն, եթե այս անգամ չանցնենք, անպայման կպատրաստվենք մյուս ընտրություններին»:

Նա հիշեցրեց, որ ոչ օբյեկտիվ պատճառներով իրենց կուսակցությունը չի հայտնվել նախորդ խորհրդարաններում, բայց դա իրենց չի ընկճել,  ինքնակազմակերպվել են, մոբիլիզացրել ուժերը:

«Ի լուր հանրապետության հայտարարել եմ, որ շրջադարձ է կատարվել լրատվամիջոցների գործունեության մեջ, լրատվամիջոցները օբյեկտիվ են լուսաբանում թե կոմունիստական կուսակցության, թե մյուս կուսակցությունների ու դաշինքների գործունեությունը»,-հավելեց նա: