Ձեր վստահելի աղբյուրը

Ստամբուլի «Ագօս» թերթի սյունակագիր Օհաննես Քըլըչդաղըն իր հոդվածում անդրադարձել է Պոլսի հայ համայնքում, պատրիարքարանում ստեղծված անառողջ մթնոլորտին և դրանում պատրիարքի փոխանորդի պաշտոնն զբաղեցնող Արամ Աթեշյանի դերակատարության ու նկարագրին:

Նրա խոսքով՝ Աթեշյանի մասին խոսելիս հանգստություն պահպանելու գերմարդկային ճիգեր են անհրաժեշտ և նրա մեջ եղած ինքնավստահությունը քիչ հանդիպող երևույթ է: Չնայած վերջին ժամանակներում նա նաև մի տեսակ խղճահարության զգացում է առաջացնում և այդ մարդու նմանատիպ ցածրանալը ամոթ է առաջացնում:  Նրան և նրա կերպարը նկարագրելու համար մի նոր Հակոբ Պարոնյան է պետք:

Ըստ հոդվածագրի՝ Աթեշյանը հայ համայնքում ստեղծված անառողջ մթնոլորտի ու վիճակի մասին այնպես է խոսում, կարծես ինքը չի հանդիսանում դրա «ճարտարապետը» և նրա խոսքերը միայն ծիծաղ ու զարմանք են առաջացնում:

«Նրա այն հայտարարությունը, որ հրաժարական չի տալու, բոլորիս ապուշի տեղ դնող հայտարարություն է: Տարիներ առաջ պատրիարքի ընտրությունների անցկացման պահանջով 6 հազար ստորագրությամբ գրությանը պատասխանել է, որ 6 հազար չէ,  60 հազար ստորագրություն էլ բերք, ինձ այստեղից չեք հեռացնի: Այդ խոսքերի և ներկայի միջև ոչ մի տարբերություն չկա: Նա սրանով ցանկանում է ասել, որ պետությունը թիկունքիս է, մնալու եմ այս աթոռին և եթե ուժներդ բավարարում է, եկեք ինձ հեռացրեք: Պետությանը մեջտեղ բերելը միանգամայն անընդունելի է»:

Հոդվածագրի խոսքերով՝ այժմ հայ համայնքի համար կարևորագույն խնդիրը այդ մարտահրավերին պատասխան տալու որոշումն է, քանի որ մեկ մարդը մարտահրավեր է նետում ողջ ժողովրդին, նրա ներկայացուցիչներին, հոգևորականներին ու ընտրված նոր տեղապահին: Որպես այս ամենին պատասխան, նա պետք է մեկուսացվի: Նրան այստեղ-այնտեղ հրավիրող, նրան այցի եկող անձինք ու կառույցները, փոխանորդի նրա կարգավիճակը ճանաչողները և նրա հետ եկեղեցում կանգնողները պատասխանատու են այս իրավիճակի  համար: Արդեն կա ընտրված պատրիարքի տեղապահ, ով պետք է զբաղեցնի իր պաշտոնը և իրականացնի իր գործառույթները:

Հիշեցնենք, որ այսօր Ամենայն Հայոց Կաթողիկոս Գարեգին Բ-ն  իր օրհնությունն է հղել Կ. Պոլսո Հայոց Պատրիարքության ընտրյալ տեղապահին: