Ձեր վստահելի աղբյուրը

«Եթե հանցագործություն է կատարվում, ապա ժամանակահատվածը դրա հետ կապ չունի՝  ով էլ որ լինի, պետք է պատժվի»,- այս մասին այսօր «Մեդիա կենտրոն»-ում հայտարարեց ՀՅԴ համապետական ցանկը գլխավորող Արմեն Ռուստամյանը՝ անդրադառնալով  Սամվել Բաբայանի ձերբակալությանը:

Պատասխանելով հարցին, թե ինչպես է Դաշնակցությունը գնահատում նախընտրական շրջանում նման ձերբակալությունները՝ հատկապես, որ ոչ վաղ անցյալում Դաշնակցությունը ունեցել է նման փորձ, Արմեն Ռուստամյանը նախ նշեց, որ  Դաշնակցության պատմությունն ավելի տխուր է եղել, ընդհանրապես կուսակցությունն է փակվել:

Ինչ վերաբերում է Սամվել Բաբայանին, ՀՅԴ ներկայացուցիչն ասաց, որ Սամվել Բաբայանին ճանաչում են իր լավագույն հատկանիշներով, ազատագրական պայքարի ժամանակ նրա հետ համագործակցել են, և ցավում են, որ նրա անունն այս ամբողջ պատմության մեջ կա:

«Իհարկե, քանի օրենքով ուժի մեջ մտած դատավճիռ չկա, մենք պարտավոր ենք առաջնորդվել անմեղության կանխավարկածով: Այսինքն՝ մարդուն չի կարելի մեղավոր համարել, քանի վճիռը չկա: Բայց ինչպես ասում են՝ «ծուխն առանց կրակ չի լինում», հնարավոր է, որ մի բան էլ կա, բայց թե ինչ, դրան տեղյակ չեմ: Քննություն է ընթանում և անիմաստ, անլուրջ գործ է հիմա  խոսել դրա մասին»,- ասաց Արմեն Ռուստամյանը:

Նա չբացառեց, որ նախընտրական փուլում մարդիկ կարող են այդ փաստն օգտագործել և նրան «քաղբանտարկյալ» անվանել. «Քաղաքական բանտարկյալ լինելու համար ԵԽ-ն հինգ չափանիշ է սահմանել և եթե դրանցից որևէ մեկը կիրառվի իր նկատմամբ, ապա նոր կհամարվի քաղբանտարկյալ: Սակայն մասնագետները պետք է փորձաքննություն անցկացնեն, որպեսզի պարզեն, թե արդյոք այդ 5 կետերից որևէ մեկը խախտվել է»։

Իսկ նման հայտարարությունները,  Արմեն Ռուստամյանն ասաց, որ լուրջ չի համարում։