Ձեր վստահելի աղբյուրը

Ներքին անձնագրերով Հայաստան ժամանելու հնարավորությամբ պայմանավորված Հայաստանում կարծում են, որ 2017-ին երկիր ժամանող ռուսաստանցի զբոսաշրջիկների թիվը կավելանա 30-50 տոկոսով:

Այս մասին «Ռիա Նովոստի» գործակալության հետ զրույցում ասել է Տնտեսական զարգացման ու ներդրումների նախարարության տուրիզմի կոմիտեի նախագահ Զարմինե Զեյթունցյանը:

«Այս տարի, ինչպես գիտեք, մենք թույլ ենք տվել, որ Ռուսաստանի քաղաքացիները Հայաստան ժամանեն ներքին անձնագրերով: Ռուսաստանցիների գրեթե 70 տոկոսն արտասահմանյան անձնագիր չունի, այդ պատճառով մենք ցանկացանք գոնե նրանց 10 տոկոսին բերել Հայաստան:
Հույս ունեմ, որ արդեն այս տարի զբոսաշրջիկների հոսքը կավելանա 30-50 տոկոսով»,-ասել է նա, հիշեցնելով, որ Հայաստան ժամանող զբոսաշրջիկների թվում ռուսներն ամենաշատն են:

Ըստ աղբյուրի, 2016-ին Հայաստան Ռուսաստանից ժամանել է 450 զբոսաշրջիկ, ռեկորդ է  գրանցվել 2014-ին, երբ նրանց թիվը հասել է 470 հազարի:

Զեյթունցյանը նշել է, որ Հայաստան ժամանող զբոսաշրջիկներին պատրաստ են առաջարկել ինչպես էքսկուրսիաներ, այնպես էլ լեռնային, դահուկային տուրիզմ, գաստրոնոմիա, ձիասպորտ և այլն:

Զեյթունցյանը նշել է, որ ռուսները հայերի համար ոչ թե զբոսաշրջիկ են, այլ ավելի շուտ՝ ընկեր ու բարեկամ: Հայաստանում գրեթե բոլորը խոսում են ռուսերեն:

«Հիմա Հայաստանից ուղիղ չվերթներ կան դեպի Մոսկվա, Սանկտ-Պետերբուրգ, Սոչի, Վորոնեժ, Կրասնորդար, Սամարա: Կարծում եմ, առաջաիկայում կավելացնենք չվերթների թիվը, ամեն ինչ կախված է պահանջարկից»,-ասել է նա: