Ձեր վստահելի աղբյուրը

Հայաստանի խորհրդարանական ընտրություններում դիտորդական առաքելություն իրականացնելու նպատակով Հայաստանում գտնվող ամերիկահայ ռոք երաժիշտ և երգահան, աշխարհահռչակ System of a Down խմբի հիմնադիր և մենակատար Սերժ Թանկյանը,  կանադահայ կինոռեժիսոր Ատոմ Էգոյանը, կանադահայ դերասանուհի և պրոդյուսեր Արսինե Խանջյանը, ամերիկահայ կինոռեժիսոր և սցենարիստ Էրիկ Նազարյանը օրվա ընթացքում եղել են Հայաստանի տարբեր մարզերի տարբեր ընտրատեղեմասերում:

Արսինե Խանջյանը ֆեյսբուքյան իր էջում պարբերաբար գրառումներ է անում՝ ներկայացնելով, թե ինչ ընտրախախտումներ է արձանագրել:

Նա գրել է, որ Գորիսի երեք տեղամասերում ընտրությունների ընթացքը վերահսկելիս ակնհայտ է դարձել, որ բազմաթիվ քաղաքացիներ ծանոթ չեն քվեարկության կարգին, թերթիկների թիվը շփոթմունք է առաջացնում, շատ էին բաց քվեարկության դեպքերը։

Նա Գորիսի 34/8 ընտրական տեղամասում արձանագրել է, որ երկու հոգի միաժամանակ քվեարկել են  նույն քվեախցում, Շաքի գյուղում «Քաղաքացի դիտորդ/Citizen Observer»-ի ներկայացուցչի նկատած ուղղորդման դեպքերը հանձնաժողովի նախագահը գրանցել է միայն իրենց այցից և պնդումներից դրդված:

«Հանձնաժողովի նախագահը և քարտուղարը չէին գրանցում դիտորդի նկատառումները՝ անձրևի ժամանակ տեղամասում եղած մարդկային կուտակումները, բաց քվեարկության դեպքերը, ընտրողների ուղղորդման դեպքերը։ Մեկ ներկայությամբ միայն քարտուղարը սկսեց գրանցել այս խախտումների մասին դիտարկումները»,- գրել է դերասանուհի դիտորդը՝  Վայոց ձորի Ռինդ գյուղում գտնվող  36/26 տեղամաս այցի ընթացքում:

Ատոմ Էգոյանն ու Էրիկ Նազարյանը նույնպես ընտրախախտումներ են արձանագրել: