Ձեր վստահելի աղբյուրը

«Ազատություն» ռադիոկայանի ուղիղ եթերում «Իրազեկ քաղաքացիների միավորում» ՀԿ նախագահ Դանիել Իոաննիսյանը հայտարարեց, որ թիվ 2 ընտրատարածքում ընդգրկված Դավթաշեն գյուղի ընտրատեղամասերում պատգամավորության թեկնածուներից մեկին աջակցելու նպատակով ոստիկանությունը, որպես գործատու, իր ծառայողներին ընդգրկել է լրացուցիչ ցուցակներում: Նա նշեց, որ այդ տարածքում առաջադրված է ոստիկանապետի փեսան:

«Ինքնին կրկնաքվեարկություն չկա: Քաղաքացիական համազգեստով կամ համազգեստով շատ ոստիկաններ եկել այստեղ էին քվեարկում: Սա իր մեջ պարունակում է ուղղորդված քվեարկության տարրեր»,-ասաց նա:

Իոնեսյանի այս հայտարարությանն արձագանքել է Ոստիկանության հասարակայնության հետ կապերի և լրատվության վարչության պետ Աշոտ Ահարոնյանը.

«Պաշտոնապես հայտարարում ենք, որ Դավթաշեն գյուղի տարածքն ընդգրկող որևէ ընտրատեղամաս ոստիկանության որևէ ծառայող չի «գործուղվել», այսինքն` իրենց բնակության վայրի հաշվառումից չեն հանվել և ծառայության վայրի ընտրացուցակներում չեն ընդգրկվել:
Ըստ գտնվելու վայրի՝ ցուցակներում 5/01, 5/02 և 5/03 տեղամասերում պարունակվում են համապատասխանաբար 3, 92 և 22 ընտրողների վերաբերյալ տեղեկություններ /խոսքը քաղաքացիական անձանց մասին է/:

Փաստորեն, մեղմ ասած, Իոաննիսյանն ակնհայտորեն իրավացի չէ:

Քաղաքացիական հագուստով ոստիկանության ծառայողները, որոնց հանդիպել է Իոաննիսյանն իր դիտարկած տեղամասում, որևէ մեղք չունեն, որ բնակվում են Դավթաշեն գյուղում և իրենց քաղաքացիական պարտքն են կատարել»: