Ձեր վստահելի աղբյուրը

«Այս պահի դրությամբ մենք ընտրությունների ընթացքը գնահատում ենք նորմալ, որևէ լուրջ մտահոգության տեղ չեն տալիս»: Լրագրողների հետ հանդիպմանը հայտարարեց ՀՀԿ փոխնախագահ Արմեն Աշոտյանը:

Նրա խոսքով, ընթացքում ծագած տեխնիկական խնդիրները հետաքրքրել են ՀՀԿ-ին, քանի որ իրենք էլ ընտրական գործընթացին մասնակից ուժ են:

«Ըմբռնումով ենք մոտենում այդ տեխնիկական խնդիրներին: Նախ և առաջ այն պարզ տրամաբանությամբ, որ քաղաքական առումով տեխնոլոգիական հեղափոխություն ենք իրականացնում երկրում: Այն բացառիկ երկրներից ենք, որտեղ ներդրվում է գերժամանակակից ընտրական համակարգ, որը տեխնիկական լուծումներով բավականաչափ բարդ է»,-ասաց Աշոտյանը:

Նա հասկանալի է համարում, որ սարքերից մի քանիսը կարող են չաշխատել. «Սարքերի թիվը տասնյակ հազարներ են, և եթե մի քանի տասնյակը չի աշխատում դա մեծ տոկոս չի կազմում և չի կարող ստվերել ընտրությունների նորմալ կազմակերպման ընթացքը»:

Նա, վկայակոչելով ԿԸՀ տվյալները, ասաց, որ ընդամենը 30 ընտրատեղամասում է գրանցվել սարքավորումների հետ կապված տեխնիկական խնդիր:

«Տոկոսային հարաբերակցությամբ 1.5 տոկոս է: Դրանց ճնշող մեծամասնությունը հարթվել է, դա չի կարող մնացած տոկոսի վրա ստվեր նետել»,-ասաց նա: