Ձեր վստահելի աղբյուրը

«Ցանկացած պարագայում, անկախ ամեն ինչից մենք մեր գործունեությունը շարունակելու ենք, իշխանափոխությունը մնալու է մեր օրակարգում։ Ակնհայտ է, որ ունենք ոչ լեգիտիմ խորհրդարան, իշխանություն, ակնհայտորեն այս նոր ձևավորված խորհրդարանով իշխանությունը չի կարողանալու պաշտապնել մեր պետական շահը»,- լրագրողների հետ հանդիպմանն ասաց «Օհանյան-Րաֆֆի-Օսկանյան» դաշինքի պատգամավորության թեկնածու, դաշինքի շտաբի ղեկավար, «Ժառանգություն» կուսակցության փոխնախագահ Արմեն Մարտիրոսյանը:

Նրա խոսքով, կա իրավիճակ, երբ, ըստ էության, հիմնական քաղաքական պրոցեսները դուրս մնացին խորհրդարանից, քանի որ ոչ թե քաղաքական պրոցես էր ընտրությունը, այլ սև քարոզչության արդյունք, ձայների առքուվաճառք, ուղղորդված քվեարկություն:

«Ակնհայտորեն երկար ժամանակ ունենալու ենք հասարակության շահերի պաշտպանության խնդիր: Մեր դաշինքը, մեզ հետ համագործակցող ուժերն այդ հասարակական շահի պաշտպանության առաջամարտիկն են լինելու: Ասել ենք, որ երկար ժամկետով ենք գալիս, ժողովրդի շահի պաշտպանության միավոր է լինելու ու այդպես էլ լինելու է»,- ասաց նա:

Ինչ վերաբերում է փողոցային պայքարին, Ա. Մարտիրոսյանը նշեց, որ փողոցային պայքարն ունի իր ժամանակահատվածը. «Պետք են որոշակի շարժառիթներ: Շատ են շարժառիթները, երբ ժողովուրդը տեսնի ինչ վիճակ է ու դուրս գա փողոց, մենք առաջին շարժում ենք լինելու»:

Դաշինքի պատգամավորության թեկնածու Հովսեփ Խուրշուդյանը նշեց, որ ընդդիմությունը պարտվեց, չկարողացավ ներկայացնել համակարգված այլընտրանք: 

««Ժառանգությունը», հետո ՕՐՕ-ն ամեն ինչ արեց, որպեսզի հնարավոր լինի լայն համախմբում իշխանության դեմ, որպեսզի այլընտրանք ձևավորվի, մարդիկ տեսնեն, որ իրենց քվեն իրական փոփոխությունների կբերի: Մեզ դա չհաջողվեց, կային պատճառներ»,- ասաց նա:

Հ.Խուշուրդյանը նշեց, որ  այն քվեները, որոնք տրվել են իրենց, պահվել են, բայց եղել է կրկնաքվեարկություն, ընտրակաշառք: 

«Չկա հասարակական ալիք, պահանջ, որովհետև այսօր  հասարակությունը չի տեսնում, որ իր քվեն կեղծվել է, իրենց ձայները կարողացել ենք պահպանել»,- հավելեց նա:  

Արմեն Մարտիրոսյանը նաև տեղեկացրեց, որ Երևանի քաղաքապետի ընտրությունների հետ կապված հարցերը դեռևս քննարկումների փուլում են. «Իմ կարծիքով, պետք չէ մասնակցել, ժողովուրդն այս իրավիճակը մարսի, տեսնի ինչ եղավ»: