Ձեր վստահելի աղբյուրը

Արաբագետ Սարգիս Գրիգորյանը Սանկտ Պետերբուրգում կատարված հարձակումը որակում է որպես ահաբեկչական հարձակում: Այսօր լրագրողների հետ հանդիպման ժամանակ արաբագետը նշեց, որ ըստ նախնական վարկածի, «Իսլամական պետության» ահաբեկչական խմբավորման ձեռքի գործն է, չնայած դեռ որևէ մեկը չի ստանձնել այդ պատասխանատվությունը:

«Մի կողմ թողնենք այն, որ ասում են՝ կատարվածը ռուսական ներքին գործողությունների մեխանիզմ է: ԻՊ ձեռագիրն ակնհայտ է և այս անգամ Ռուսաստանն ընկավ նրանց թիրախը: Գործել է մահապարտ ահաբեկիչ և առաջին անգամ է, որ նա կենտրոնական Ասիայից է, այսինքն արեալն ընդլայնվում է»,-ասաց Սարգիս Գրիգորյանը:

Արաբագետի խոսքով, երեկ ուղերձ հղեց ԻՊ մամուլի խոսնակը, որտեղ Պետերբուրգի մասին ոչինչ չի ասել. «Ես գտնում եմ, որ սրան կարող է հաջորդել պատասխանատվության ստանձնումը: Ամբողջ վերլուծությունը ցույց է տալիս, որ սպառնալիքն ավելի է ուժգնանում, հնարավոր չի դառնում հսկել, վերահսկել, կանխարգելել նրանց գործողությունը: Մենք գործ ունենք մի երևույթի հետ, որը համատարած է դառնում»:

Սարգիս Գրիգորյանն ավելացրեց, որ ամեն դեպքում պետք է ֆիքսել, որ ոչ բոլոր մուսուլմանններն են ահաբեկիչ և ոչ բոլոր ահաբեկիչներն են մուսուլման: