Ձեր վստահելի աղբյուրը

««Բարգավաճ Հայաստանը» հայտարարել է, որ ընդդիմություն է: Իմ անձնական տեսակետով «Բարգավաճ Հայաստան»-ը կարող է ընդդիմության դերը տանել»,-լրագրողների հետ հանդիպմանն ասաց «Օհանյան-Րաֆֆի-Օսկանյան» դաշինքի պատգամավորության թեկնածու Արմեն Մարտիրոսյանը՝ պատասխանելով հարցին, թե խորհրդարան անցած ուժերից ո՞ւմ եք համարում ընդդիմություն:

Նա նաև նշեց, որ դասական իմաստով ընդդիմություն չի լինի, մի փոքր այլ ձևի. «Միևնույն է, այս պահին իրապես ժողովրդի շահի պաշտպանություն տեսնում եմ այդտեղ: Թեև մտավախություն ունեմ, որ իշխանությունը, Գագիկ Ծառուկյանի տանիքի տակից  առանձին պատգամավորների հետ աշխատելով, կփորձի քանդել «Ծառուկյան» դաշինքը: Գագիկ Ծառուկյան անձնավորությունն ինձ համար այլ է, դաշինքն այլ բան է: Դրա համար այդպիսի մտավախություն ունեմ»:

Ասուլիսին ներկա դաշինքի ներկայացուցիչ Հովսեփ Խուրշուդյանն ասաց, որ դասական իմաստով այն ուժը, ով հայտարարում է իր ընդդիմություն լինելու մասին, նա ընդդիմություն է:

«Հասկանալի է գործարքների պահը, ընտրակաշառք բաժանելով խորհրդարան մտնելու պահը: Բայց ընդդիմություն է այն ուժը, ով հայտարարում է ընդդիմություն է, մաս չի կազմում կառավարությանը, դեմ է  քվեարկում կառավարության ծրագրերին: Կտեսնենք իրենց քայլերից»,- ասաց նա: