Ձեր վստահելի աղբյուրը

ՀՀ Ազգային ժողովի նախագահ Գալուստ Սահակյանի գնահատմամբ` ապրիլի երկուսին կայացած հերթական խորհրդարանական ընտրությունները ցույց տվեցին, որ մեր երկիրը՝ ի դեմս քաղաքական ուժերի և քաղաքացիների, ունի առաջ շարժվելու թե՛ հնարավորություն, թե՛ ցանկություն և թե՛ կամք:

ԱԺ նախագահի տարածած խոսքում ասված է.

«Մեր քաղաքացիներն ու քաղաքական ուժերն ընտրությունների միջոցով կարողացան վստահորեն իրացնել ավելի ապահով ու ավելի բարեկեցիկ, ավելի անվտանգ և ավելի զարգացած պետություն ունենալու իրենց հնարավորությունը»:

Ազգային ժողովի ընտրությունների վերաբերյալ իր հայտարարության մեջ Ազգային ժողովի նախագահ Գալուստ Սահակյանը նաև նշել է, որ այս ընտրությունները համախմբող ընտրություններ էին, որոնք, անկախ իրենց արդյունքից, վկայեցին, որ տարբեր ծրագրեր ներկայացնելով հանդերձ՝ քաղաքական ուժերն իրենց պատասխանատու են զգում երկրի ճակատագրի համար, իսկ քաղաքացիները, ունենալով տարբեր տեսակետներ, հաստատակամորեն պատրաստ են իրենց քվեներով ստանձնելու պատասխանատվության իրե՛նց բաժինը: Հետևաբար, այս ընտրությունները նաև պատասխանատվության ընտրություն էին:

«Թե՛ մեր, և թե՛ ընտրություններին հետևող միջազգային կառույցների ու կազմակերպությունների ներկայացուցիչների գնահատմամբ, մեզ հիմնականում հաջողվեց արժանապատիվ քննություն բռնել, ինչի համար շնորհակալությունս եմ ուզում հայտնել բոլորիս և բոլորին՝ ինչպես ընտրությունների մասնակիցներին, այնպես էլ դրանք դիտարկողներին:

Վստահ եմ, որ մեզ սպասում է նույնքան անցնցում և խաղաղ հետընտրական ժամանակաշրջան, ստեղծագործ ու հետևողական աշխատանքի ժամանակաշրջան, փոխվելու և փոխելու ժամանակաշրջան:

Ընտրություններին հաջորդել է ավելի ջանադիր աշխատելու, անվտանգության գինն ավելի խորն ու ավելի սթափ գիտակցելու, քաղաքական ու քաղաքացիական ավելի բարձր գիտակցությամբ երկիրն առաջ տանելու ժամանակը:

Համոզված եմ, որ արժանապատվորեն ենք տնօրինելու այդ ժամանակը՝ այն ծառայեցնելով ավելի բարեկեցիկ հասարակություն և ավելի անվտանգ երկիր ունենալու գործին»,-ասված է ԱԺ նախագահի հայտարարության մեջ: