Ձեր վստահելի աղբյուրը

ՀՀ մշակույթի նախարար Արմեն Ամիրյանը «Ազատություն» ռադիոկայանի հետ զրույցում օրեր առաջ հայտնել էր Ալ. Սպենդիարյանի անվան օպերայի և բալետի ազգային  ակադեմիական թատրոնի հետ կապված ծրագրի մասին, ըստ որի  թատրոնը  պետք է դառնա ընտանեկան հանգստի վայր, կլինեն բացօթյա ռեստորաններ և ոչ միայն:

Դրանից հետո տարբեր արվեստագետներ, մշակույթի գործիչներ իրենց դժգոհությունն արտահայտեցին: Panorama.am-ի հետ զրույցում ճարտարապետ Սաշուր Քալաշյանը նման ծրագիրը «խայտառակություն» անվանեց:

«Թատրոնը չի կարող դառնալ հանգստի վայր, թատրոնը մշակույթի օբյեկտ է: Թատրոնը չի կարող լինել ընտանեկան հանգստի վայր, նշանակում է վերացնել թատրոնը: Թատրոնը սրբություն է, չի կարելի ոտնահարել»,- ասաց  վաստակավոր ճարտարապետը:

Գեղանկարիչ Հաղթանակ Շահումյանի կարծիքով, օպերային թատրոնում կարող է սրճարան լինել աշխատողների, արտիստների, հանդիսականների համար, բայց ոչ դրսի մարդկանց համար:

«Խորհրդային տարիներին լավ բուֆետ կար, հիմա շատ խեղճուկրակ վիճակում է: Բայց որ ռեստորան դառնա, ժամանացային վայր՝ դհոլ-զուռնայով, կամ թեկուզ դասական երաժշտությամբ, կարծում եմ …Արմեն Ամիրյանը, կարծում եմ, կխորհրդակցի մարդկանց հետո,  ճիշտ ձևը կընտրեն: Չի կարելի օպերան, մշակույթի միջավայրը դարձնել ժամանցային վայր: Շատ զգույշ պետք  է վերաբերվել»,- ասաց նա:

Այսօր մշակույթի նախարար Արմեն Ամիրյանը հանդես է եկել պարզաբանմամբ. «Ժամանակն է, որ Օպերային թատրոնն իրական բարձր արվեստի դիմագիծ ունենա. նկատի ունեմ և′ խաղացանկը, և′ շենքային պայմանները։ Բայց քանի որ լրատվամիջոցներում ամենաթարմ արձագանքը շենքային պայմանների մասին է, ուստի ուզում եմ պարզաբանում տալ հենց այդ հարցով։
Թատրոնի ճեմասրահում գործող «կայարանային» սննդի կետերից պետք է հրաժարվենք. խորհրդային մտածողության հասարակական սննդի կետերը պատիվ չեն բերում մեր Օպերային թատրոնին։ Պետք է հրաժարվենք նաև «սենդվիչներ» ու գազավորված ըմպելիքներ մատուցող՝ այսօր եղած «ավտոմատներից»։
Ներկայացումների ընդմիջումներին մատուցվող մեկ բաժակ շամպայնը կամ հարմարավետ միջավայրում սուրճ խմելը, կարծում եմ, օպերային ներկայացման պատկերացման մեջ լիովին տեղավորվում է։
Տարիներ շարունակ Օպերային թատրոնում գործող «Օպերա» ակումբի հարցը ևս պետք է վերանայվի։ Չի′ կարելի Օպերային թատրոնում ունենալ նման թատրոնին ոչ հարիր հաստատություններ։ Օպերային թատրոնը պետք է ունենա ճաշելու և սնվելու՝ իր բովանդակությանը հարիր հատված, որտեղ և′ Թատրոնի արտիստները կսնվեն իրենց հատուկ սննդակարգով, և′ այցելուները կարող են համապատասխան միջավայրում ճաշել, և որտեղ հնարավոր կլինի հյուրեր ընդունել, կազմակերպել շնորհանդեսներ, տարբեր հյուրասիրություններ։
Ծայրահեղ կարծիքներ հայտնելը՝ ծանոթ չլինելով Օպերային թատրոնի միջավայրի նախագծին, կարծում եմ, կոռեկտ չէ։
Նախագիծը մշակվում է, և պատրաստ լինելուն պես անպայման կներկայացվի հանրության քննարկմանը։ Հաշվի կառնվեն տեղին, բայց ոչ՝ միայն «սուր ճոճելու» համար հնչող կարծիքները»։