Ձեր վստահելի աղբյուրը

«Մշակվում է Ալ. Սպենդիարյանի անվան օպերայի և բալետի ազգային  ակադեմիական թատրոնի ենթակառուցվածքների նախագիծ՝ սկսած սանհանգույցներից, պատշգամբներից, մինչև բեմ: Այսօր մշակվում է ծրագրային, խաղացանկային քաղաքականություն»,- լրագրողներ հետ զրույցում ասաց մշակույթի նախարար Արմեն Ամիրյանը:

Նրա խոսքով, անպայման պետք է լինի երկրորդ բեմը՝ մանկական օպերային ներկայացումներ պատրաստելու համար:

«Անպայման պետք է լինի հատուկ սննդակարգի ռեստորաններ, որոնք կարող են ապահովել օպերային թատրոնի արտիստների սննդակարգը: Այդ տարածքները պետք է ծառայեն նաև շնորհանդեսների, հյուրասիրությունների, թատրոն այցելած հյուրերի համար: Նշված հաստատությունները ծառայելու են միայն օպերա այցելուների համար, ոչ դրսից այցելուների համար»,- ասաց նախարարը:

Ա. Ամիրյանը նաև նշեց, որ պետք է լինի մարզասրահ, շոգեբաղնիք. «Բալետի պարողների, օպերային արտիստների համար շատ կարևոր է որպեսզի լինեն լավ մարզավիճակում, ավելորդ քաշը, ծանրությունը կարողանան այդ միջոցով պակասեցնեն լավ երգելու, պարելու համար: Օպերայում  ժամանակին եղել է մարզասրահ, շոգեբաղնիք, այսինքն՝ այն, ինչ անհրաժեշտ էր օպերային արտիստների համար, քանդել են ու կառուցել տարբեր տիպի հաստատություններ»:

Արմեն Ամիրյանն ասաց, որ օպերային թատրոնը բարձր արվեստ պրոպագանդելու համար է, հայ դասական երաժշտությունը հանրահռչակելու համար է:

«Անշուշտ պետք է լինի պետության հովանու ներքո և ամեն բան ծառայի օպերայի արտիստներին»,- նշեց մշակույթի նախարարը:

Հարցին՝  պետական բյուջեի՞ց է հատկացվելու ֆինանսը, նախարարը պատասխանեց. «Այո, այո»:

Ա. Ամիրյանն ասաց, որ նախագիծը պատրաստ լինելու դեպքում դրվելու է հանրային քննարկման, բոլորը կարող են արտահայտել իրենց կարծիքները:

«Համոզված եմ ու վստահ, որ ծրագրվող նախագիծը գոհացնելու է բոլորին»,- հավելեց նախարարը: