Ձեր վստահելի աղբյուրը

Արամ Խաչատրյան համերգասրահում ապրիլի 10-ին կայանալու է բարեգործական համերգ՝ ի խոնարհում ապրիլյան պատերազմի հերոսներին: «Երդվում եմ քեզ իմ երկիր» խորագրով համերգին հնչելու են Ռոբերտ Ամիրխանյանի հայրենասիրական երգերը: 

«Դեռ մի քանի ամիս առաջ մաեստրո Ամիրխանյանի հետ մետքեր էին փոխանակում և որոշեցինք կազմակերպել նման համերգ»,- լրագրողների հետ հանդիպմանն ասաց Հայաստանի ֆիլհարմոնիկ նվագախմբի տնօրեն Ռուզան Սիրունյանը: 

Նա  նշեց, որ Հայաստանի ազգային ֆիլհարմոնիկ նվագախումբը մշտապես եղել և մնում է հայոց բանակի կողքին: Ռ.Սիրունյանը հիշեցրեց, որ 2016-ի ապրիլի 9-ին Կասկադում կազմակերպել էին «Զինվորիս հետ» խորագրով բացօթյա համերգ և դրամահավաք՝ զորավիգ լինելով ապրիլյան պատերազմի օրերին Արցախի սահմաններին քաջաբար մարտնչող հայ զինվորներին և նրանց ընտանիքներին:

Ապրիլի 10-ի համերգին Ֆիլհարմոնիկ նվագախմբին և Ռոբերտ Ամիրխանյանին են միացել երեք պետական երգչախումբ՝   «Հովեր» պետական կամերային երգչախումբը (գեղարվեստական ղեկավար և խմբավար՝ Սոնա Հովհաննիսյան), Հայաստանի պետական կամերային երգչախումբը (գեղարվեստական ղեկավար և խմբավար՝ Ռոբերտ Մլքեյան), Երևանի պետական կամերային երգչախումբը (գեղարվեստական ղեկավար և խմբավար՝ Հարություն Թոփիկյան), մենակատարներն են  Գուրգեն Բավեյանը, Աննա Ավդալյանը, Էմմա Պետրոսյանը, Լեյլա Սարիբեկյանը, Վահե Հախվերդյանը:

«Իմ կյանքի մեջ այս համերգի տեսակը ես չեմ ունեցել: Այս համերգը բոլորովին ուրիշ խորհուրդ ունի իր մեջ, որովհետև սա մենակ մարդու երգը չէ, մենակ ապրող մարդու խոսքը չէ, սա իր ժողովրդի գրկի մեջ ապրող մարդու խոսք է»,- ասաց ասուլիսին ներկա կոմպոզիտոր Ռոբերտ Ամիրխանյանը:

Նա ընդգծեց, որ չափազանց կարևոր է հայրենասիրական խոսքը:  Ռ. Ամիրխանյանն ասաց, որ հայրենասիրական երգերի մեջ կան հատուկ այս նպատակով գրված երգեր:

«Հովեր» պետական կամերային երգչախմբի գեղարվեստական ղեկավար և խմբավար Սոնա Հովհաննիսյանը նշեց, որ շատ կարոտել են Ռ. Ամիրխանյանի երգերին, մտածողությանը, դրանք իսկական, ջերմացնող երգեր են:

Հայաստանի ազգային ֆիլհարմոնիկ նվագախմբի գեղարվեստական ղեկավար և դիրիժոր Էդուարդ Թոփչյանն ասաց, որ արդեն մեկ փորձ արել են, բոլորը պատրաստ են, ոգեշնչված:

«Հուսամ՝ մեր հերոսներին և երկրին արժանի համերգ պետք է մատուցենք»,- հավելեց Է.Թոփչյանը:

Հարցին, թե բարեգործական համերգից հավաքված գումարն ո՞ւր է ուղղվելու, Ռուզան Սիրունյանն ասաց, որ պաշտպանության նախարարության կողմից որոշակի ցուցակներ կունենան, որոնցով կառաջնորդվեն, ինչպես անցած տարվա համերգի  ժամանակ, երբ հավաքված գումարը բաժանել էին 22 զոհված զինվորի ընտանիքի:

Համերգը հնարավոր է այս տարվա հունիսին կամ հուլիսին նաև Արցախում կազմակերպվի: Նախնական պայմանավորվածության կա:

Ասուլիսի մանրամասներն ու ապրիլի 10-ի համերգի փորձից մեկ հատված՝ տեսանյութում