Ձեր վստահելի աղբյուրը

«Նորընտիր Ազգային ժողովն աշխատանքները սկսելու է ապրիլի 27-ից, եթե ՀԱԿ-ՀԺԿ դաշինքը ընտրությունների արդյունքները չբողոքարկի Սահմանադրական դատարանում: Բողոքարկելու դեպքում արդեն կախված է լինելու այն հանգամանքից, թե ՍԴ-ն ինչ ժամկետում այդ դիմումը կքննի»,-ԱԺ-ում լրագրողների հետ զրույցում ասաց ՀՀ ԱԺ աշխատակազմի ղեկավար Հրայր Թովմասյանը:

Հիշեցնենք, որ ապրիլի 7-ին Կոնգրես-ՀԺԿ դաշինքը դիմել է ԿԸՀ՝ ընտրությունները անվավեր ճանաչելու պահանջով: Նախօրեին կայացած ԿԸՀ արտահերթ նիստում մերժվեց «Կոնգրես-ՀԺԿ» դիմումն այն պատճառաբանությամբ, որ դիմումը զուրկ է որևէ իրավական հիմնավորումներից և չկա փաստական ապացույց:

Հրայր Թովմասյանը նաև տեղեկացրեց, որ համաձայն Սահմանադրության` նոր խորհրդարանի առաջին նիստի օրը կառավարությունը հրաժարական կտա. «Դրանից հետո 10 օրվա ընթացքում կնշանակվի նոր վարչապետ, 20 օրվա ընթացքում, առավելագույն ժամկետներն են, կձևավորվի կառավարություն,  20 օրվա ընթացքում կառավարությունը Ազգային ժողովին կներկայացնի իր ծրագիրը, որը խորհրդարանը կքննարկի արտահերթ ռեժիմով՝ 5-օրյա ժամկետում»:

Հ. Թովմասյանն ասաց, որ ԱԺ նոր խորհրդարանի առաջին նստաշրջանի ժամանակ ԱԺ որոշմամբ կսահմանվի, թե ԱԺ-ն քանի մշտական հանձնաժողով է ունենալու: Սահմանադրությամբ դրանք 12-ից ավելի չեն կարող լինել:

«Մենք ունեցել ենք և 6 հանձնաժողով, դրանից հետո՝ 12:  Կարծում եմ, որ օպտիմալ է 8-10 հանձնաժողովը: Վստահորեն կարող եմ ասել, որ դրանց թիվը կկրճատվի, քանիսով՝ այս պահին կդժվարանամ ասեմ»,- նշեց նա՝ հավանական համարելով Եվրոպական ինտեգրման հարցերի ու Մարդու իրավունքների պաշտպանության և հանրային հարցերի մշտական հանձնաժողովները:

ՀՀ ԱԺ աշխատակազմի ղեկավարի խոսքով, Մարդու իրավունքների հանձնաժողովի լիազորությունները նույնն են, ինչ Պետական-իրավական հարցերի մշտական հանձնաժողովի, իսկ Եվրոպական ինտեգրման հարցերինը՝ միջազգային հարաբերությունների ոլորտն է: