Ձեր վստահելի աղբյուրը

Հունահռոմեական ըմբիշ Արսեն Ջուլֆալակյանը մոտ կես տարի դադարից հետո գորգ է վերադարձել հաղթանակով: Հայ ըմբիշը հաղթել է օլիմպիական չեմպիոն Քրիստիան Պալուսալուի հուշամրցաշարում:

Ջուլֆալակյանը Ռիոյի օլիմպիական խաղերից հետո առաջին անգամ մասնակցել է միջազգային մրցաշարի:

«Էստոնիայի մրցագորգում տարած հաղթանակը եւս մեկ ապացույց էր, որ ես դեռ անելիք ունեմ սպորտում, Արսեն Ջուլֆալակյան մարզիկը կա: Ինքս համոզվեցի, որ բարդ ժամանակներն արդեն անցյալում են:

Օլիմպիական խաղերից հետո հոգեբանական ծանր վիճակում էի: Ռիոյում այլ արդյունք էի ակնկալում, սակայն չստացվեց: Ինձ պետք էր վերականգնվել: Չէի ցանկանում մեծ սպորտից պարտությամբ հեռանալ: Երեւի հենց այս միտքն ինձ մոտիվացրեց, որ շարունակեմ կարիերաս:

Հոգեբանական վիճակի եւ վնասվածքի պատճառով մոտ կես տարի բաց թողեցի: Կարողացա հաղթահարել այդ ծանր ժամանակահատվածը եւ նորից սկսեցի մարզվել: Անկեղծ ասած, ըմբշամարտի կանոնների փոփոխությունների պատճառով երկմտում էի՝ վերադառնալ գորգ, թե՝ ոչ: Բայց հետո իմացա, որ չորեքթաթ դիրքը նորից վերականգնվում է: Եթե դա չլիներ, ավելի շատ հակված էի միջազգային կարիերաս դադարեցնելու մտքին»,- ՀԱՕԿ լրատվականի հետ զրույցում ասել է ըմբիշը:

Արսեն Ջուլֆալակյանը չի մասնակցի Եվրոպայի առաջնությանը, սակայն կշարունակի մարզվել հավաքականի հետ. «Լևոն Ջուլֆալակյանի հետ որոշեցինք, որ բաց թողնեմ Եվրոպայի առաջնությունը: Մարտից մարզվում եմ և մայիսին լիովին պատրաստ չէի լինի: Չեմ ցանկանում պարզապես մասնակցության համար հանդես գալ:

Մինչ այս մարզվում էի հավաքականում, սակայն առանձին ծրագրով, քանի որ այլ մրցաշարի էի պատրաստվում: Այժմ կրկին կլինեմ գլխավոր թիմի հետ: Եվրոպայի առաջնությունից հետո կշարունակեմ հավաքականի ծրագրով»: :