Ձեր վստահելի աղբյուրը

Կրթության և գիտության նախարարությունում թիվ 127 դպրոցի աշակերտների ինքավնասման դեպքը չեն շտապում  որակել: «Ոստիկանությունը զբաղվում է դրանով, համապատասխան գնահատական կտրվի»,-Panorama.am-ին ասաց ԿԳՆ հանրակրթության վարչության պետ Աշոտ Արշակյանը:

Նրա խոսքով, դպրոցի տնօրենը հրավիրվել է նախարարություն, անհրաժեշտ պարզաբանումներ կտրվեն:

«Ավելի մանրամասն տեղեկություններ կարող ենք տրամադրել տնօրենի պարզաբանումները ստանալուց հետո»,-ասաց նա:

Նշենք, որ  լրատվամիջոցները գրեցին, որ երեխաներն իրենց վնասել են դասագրքերի գումարը վճարել չկարողանալու պատճառով: Վարչության պետը մինչ տնօրենի՝ ԿԳՆ գալը նրա հետ խոսել է հեռախոսով:

«Որքան ես հասկացա, մեկ երեխայի վարձավճարի հետ կապված խնդիր կա, մյուսի հետ նման խնդիր չկա»,-ասաց նա:

Արշակյանի փոխանցմամբ, դեպքը տեղի է ունեցել դպրոցից դուրս: Նրանց մոտ առողջական որևէ խնդիր չկա:

«Այլ մանրամասներ կհայտնի ոստիկանությունը փորձաքննություններից հետո»,-ասաց նա: