ԵՀՄ-ն պաշտոնապես հաստատել է՝ ՌԴ-ն չի մասնակցելու «Եվրատեսիլ»-ին

Հասարակություն 16:09 14/04/2017 Աշխարհում

Եվրոպական հեռարձակողների միությունը (ԵՀՄ) պաշտոնապես հաստատել է, որ Ռուսաստանը չի մասնակցելու «Եվրատեսիլ-2017» երգի միջազգային մրցույթին: Ռիա նովոստիի հաղորդմամբ, համապատասխան հայտարարությունը տեղադրված է մրցույթի պաշտոնական կայքում:

Կազմակերպության ներկայացուցիչն ընդգծել է, որ «փորձում էին գտնել լուծում, որը թույլ կտար Ռուսաստանին մասնակցելու միջոցառմանը»: Ռուս մասնակցին առաջարկվել էր ելույթ ունենալ տեսակամուրջի միջոցով: Բացի այդ, կազմկոմիտեն առաջարկել էր փոխել կատարողին:

«Ցավոք, երկու տարբերակն էլ չընդունվեց «Առաջին ալիքի» կողմից: Դրա ղեկավարությունը հայտարարել էր, որ չի հեռարձակելու «Եվրատեսիլ-2017»-ը: Դա նշանակում է, որ Ռուսաստանն այս տարի չի կարող մասնակցել մրցույթին: Մենք, իրոք, ցանկանում էինք, որպեսզի բոլոր 43 պետությունն էլ ելույթ ունենային և հնարավոր ամեն ինչ արել ենք դրա համար»,- ասված է Եվրոպական հեռարձակողների միության հայտարարության մեջ:

Միաժամանակ Եվրատեսիլի դիտորդական խորհրդի ղեկավարն ասել է, որ ուկրաինական իշխանությունների գործողությունները հակասում են մրցույթի ոգուն. «Մենք խստորեն դատապարտում ենք Կիևի որոշումն՝ արգելել Յուլյա Սամոյլովայի մուտքը Ուկրաինա և կարծում ենք, որ այն խարխլում է մրցույթի ամբողջականությունը և ոչ քաղաքական բնույթը, առաքելությունը՝ միավորել բոլոր երկրներին ընկերական մրցակցության շուրջ»:

Ավելի վաղ Ռուսաստանի Առաջին ալիքը հայտարարել էր, որ չի հեռարձակելու «Եվրատեսիլ-2017» մրցույթն այն պատճառով, որ Կիևը հրաժարվել է ընդունել ռուս մասնակցին:

Ուկրաինայի Ազգային անվտանգությունը երեք տարով արգելել է Յուլյա Սամոյլովայի մուտքը երկրի տարածք Ղրիմում ելույթ ունենալու համար:

Նշենք, որ մրցույթն այս տարի կանցկացվի մայիսի 9-ին, 11-ին և 13-ին Կիևում: «Եվրատեսիլ-2017»-ին կմասնակցի 42 պետություն: Երգի միջազգային մրցույթին Հայաստանը կներկայացնի Արծվիկը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: