Ձեր վստահելի աղբյուրը

«Մշակույթի նախարարությունը քարանձավները վարձակալության տալու մրցույթ հայտարարելու հայտով  ներկայացրել է ծրագրի պահանջ, որի նախագիծը պետք է լինի ոչ թե քարանձավների օգտագործում, այլ ստացվելու է շահագործում»,-լրագրողների հետ հանդիպմանն ասաց Քարանձավագիտական կենտրոնի ղեկավար Սամվել Շահինյանը:

Նրա խոսքով, տարածքները, որտեղ գտնվում են քարանձավները, զբոսաշրջիկներ շատ են այցելում, տուրիստական կենտրոններ են. «Կան շատ մարդիկ, ովքեր ուզում եմ այնտեղ ռեստորաններ կառուցել: Շատ լավ առիթ է՝  կմասնակցեն մրցույթին, կհայտարարեն, որ բոլոր պայմանները կատարելու են:

Այստեղ է վտանգը. հայտով միաժամանակ բնապահպանական խնդիրների տարօրինակ փունջ են դրել: Այսինքն՝ մրցույթը հաղթողը կսկսի այդ տարածքում կառուցել ռեստորան, խաղահրապարակ, այլ ենթակառուցվածքներ, քարանձավին ձեռք չի տա՝ պնդելով, որ բնապահպանական խնդիրներ կան, դեռ պետք է լուծվեն, բնապահպանների հետ բանակցությունների մեջ են, մինչև կողմնորոշվեն: Դառնալու է սովորական բիզնեսմենին լավություն անելու... Նախարարությունը պարտադրում է քարանձավի բարեկարգում, խնամք, բայց մի ամբողջ խումբ բնապահպանական հարցեր է դրել, որոնք հերքելի բնապահպանական են»,- ասաց Ս. Շահինյանը:

Միաժամանակ նա նշեց, որ  մրցույթին մասնակցողից պահանջվում են մի շարք նյութեր, որոնք դժվար է  45 օրվա ընթացքում հավաքել և ներկայացնել:  Նրա խոսքով, լավագույն ուժերի մասնակցությամբ առնվազն 18 ամիս պետք է այդ նյութերը հավաքելու համար:

«Հնարավոր չէ այդ ժամկետում այդքան փաստաթուղթ հավաքել: Դա նշանակում է, որ այդտեղ մեքենայություն կա, ոչ մաքուր գործարք է: Ուրեմն ինչ-որ մեկի մոտ կան այդ նյութերը: Կարծում եմ, որ կան մարդիկ կամ մարդ, ովքեր այս փաթեթն արդեն ունեն, թե որտեղից՝ չգիտեմ, պատրաստ են մտնելու և միանգամից պայմանագիրը կնքելու, վերցնելու բոլոր քարանձավները»,- ասաց Ս. Շահինյանը:

Հիշեցնենք, որ Հայաստանի մշակույթի նախարարությունը հայտարարել է զբոսաշրջության նպատակով 4 քարանձավներ և մեկ քարանձավախումբ՝ «Մագելանի», «Թռչունների», «Արջի»,  «Մոզրովի»,  «Քարե դռներ» քարանձավներ կամ քարայր կացարաններ,  5-ական տարով վարձակալության տալու մրցույթ: Բոլոր 5-ը պատմության և մշակույթի անշարժ հուշարձանի կարգավիճակ ունեն։ Հայտերը պետք է ներկայացնել հայերեն՝ մինչև 2017թ. մայիսի 12-ը: