Ձեր վստահելի աղբյուրը

Նախօրեին Թուրքիայում կայացած սահմանադրական փոփոխությունների վերաբերյալ հանրաքվեից հետո նախագահ Ռեջեփ Թայիփ Էրդողանին շտապել են առաջինը շնորհավորել Ադրբեջանի, Քաթարի և Պաղեստինի նախագահները: Այս մասին հայտնում են թուրքական լրատվամիջոցները:

Հայտնի է, որ Էրդողանին առաջինը շնորհավորել է Ադրբեջանի նախագահ Իլհամ Ալիևը:
«Հանրաքվեի արդյունքները արտացոլում են ժողովրդի կողմից Ձեր նկատմամբ ունեցած հավատն ու վստահությունը, և հանդիսանում են գնահատականը Ձեր կողմից իրականացվող արդյունավետ քաղաքականության, որն ուղղված է եղբայրական Թուրքիայի զարգացմանն ու հզորացմանը»,-մեջբերում է «ТАСС» գործակալությունը Իլհամ Ալիևի շնորհավորական ուղերձը: 

Նշենք, որ սահմանադրական բարեփոխումներին Թուրքիայում կողմ է քվեարկել 51.3 տոկոսը, դեմ` 48.55-ը: Հանրաքվեին մասնակցության հայտը կազմել է 84 տոկոս:

Փոփոխությունների այս ծրագիրը ենթադրում է, որ նախագահը դառնում է պետական համակարգի ղեկավար և նրան են պատկանում փոխնախագահների, նախարարների և բարձրաստիճան պաշտոնյաների նշանակման լիազորությունները:

Նախարարությունների ստեղծման, լիազորությունների, պարտավորությունների և կառուցվածքի մասին որոշումները կկայացվեն նախագահի հրամանների համաձայն: