Ձեր վստահելի աղբյուրը

Թուրքիայում նախագահի լիազորություններն ընդարձակող հանրաքվեն տեղի է ունեցել անհավասար հնարավորությունների պայմաններում: Այս մասին BBC-ի փոխանցմամբ, հայտարարել են ԵԱՀԿ դիտորդական առաքելությունից:

«Մեր դիտարկումը ցույց է տվել, որ «այո»-ի օգտին իրականացված արշավը դոմինանտ է եղել մամուլում, իսկ այդ ամենն էլ ուղեկցվել է ԶԼՄ-ների աշխատանքը խոչընդոտելով, լրագրողների ձերբակալություններով ու խմբագրությունների փակմամբ, որն էլ սահմանափակել է ընտրողների՝ տեղեկատվական այլ աղբյուրներին հասանելիությունը»,- հայտարարել են դիտորդական առաքելությունից:

Միաժամանակ նշվում է, որ Թուրքիայի իշխանություններն իրենց օգտին են ծառայեցրել երկրում  նախորդ ամառվա իրադարձությունների հետևանքով հաստատված արտակարգ դրության ռեժիմն՝ այդ կերպ սահմանափակելով խոսքի և արտահայտման ազատությունները:

«Ընդհանուր առմամբ հանրաքվեն չի համապատասխանել եվրոպական չափորոշիչներին»,- գնահատելով անցկացված հանրաքվեն՝ նշել է ԵԽԽՎ դիտորդական առաքելության ղեկավար Ֆլորինա Պրեդան:

Թուրքիայի նախագահ Ռեջեփ Թայիփ Էրդողնանն էլ իր հերթին արձագանքել է եվրոպական կառույցների քննադատությանը՝ հայտարարելով, որ այդ կառույցները նախ՝ պետք է իրենց տեղը ճանաչեն, նոր հետո գնահատականներ հնչեցնեն:

«Ինչ-որ մի կազմակերպություն կա՝ ԵԱՀԿ անունով: Հիմա նրանք ինչ-որ զեկույց են պատրաստում առ այն, որ Թուրքիայում հանրաքվեն իբրև այսպես կամ այնպես է եղել: Առաջին հերթին թող դրանք իրենց տեղն իմանան»,- հայտարարել է Էրդողանը:

Ապրիլի 16-ին Թուրքիայում տեղի են ունեցել սահմանադրական փոփոխություններ՝ ուղղված երկրում ընդարձակ լիազորություններով նախագահական կառավարման ձև սահմանելուն: