Ձեր վստահելի աղբյուրը

Ապրիլի 18-ին ապրիլյան պատերազմի ժամանակ Թալիշում զոհված զինծառայող Սարգիս Սահակյանը կդառնար 22  տարեկան:

2016թ-ի ապրիլի 3-ին իրականացված մարտական գործողության ընթացքում անտեսելով ինտենսիվ հրետակոծությունը, Սարգիսը մարտի է նետվել և ոչնչացրել է հակառակորդի բազմաթիվ գրոհայինների՝ խափանելով նրանց ամրացումը դիրքում: Հետմահու պարգևատրվել է Հայաստանի Հանրապետության Մարտական խաչ երկրորդ աստիճանի շքանշանով:

Ապրիլյան պատերազմի հերոսը ծնվել է 1995 թվականին, Կոտայքի մարզի Հրազդան քաղաքում: 4 տարեկանում ընտանիքը տեղափոխվել և բնակություն է հաստատել Ռուսաստանում: 12 տարի հետո վերադարձել են Հայաստան:

Սարգիսի մայրը՝  Թամարա Ղազարյանը, պատմել է, որ որդին սիրված էր բոլորի կողմից. «Կարգապահ, խելոք տղա էր: Ռուսաստանում ուսուցիչները  աշակերտներին միշտ ասում էին, որ Սարգսից օրինակ վերցնեն»:

Մոր խոսքերով՝ Սարգիսը թեև դժվար մանկություն է ունեցել, բայց միշտ իրեն հույս է տվել, որ ամեն ինչ լավ է լինելու: 

Սարգիսը մեծացել էր հայրենիքից հեռու, բայց դպրոցն ավարտելուց հետո Ռուսաստանից ինքնակամ վերադարձել է Հայաստան ու մեկնել զինվորական ծառայության: Որոշել էր, որ ծառայությունից հետո ուսումը շարունակելու է Հայաստանում, ուզում էր ծրագրավորող դառնար:

Երկար տարիներ զբաղվել է սպորտով, մասնավորապես՝ ֆուտբոլով, երազում էր  հայտնի ֆուտբոլիստ դառնալ, հանդիպել Հենրիխ Մխիթարյանի հետ:

«Ասում էր՝ մամ,  դու պիտի միշտ ինձնով հպարտանաս»,- պատմում է մայրը:

Մարտական ընկերների բնորոշմամբ՝ Սարգիսին բոլորն էին հարգում.
«Բանակում նրան բոլորը «Ռուսկի» էին կոչում,  մարդ կար անունը չգիտեր: Նվիրված  ընկեր էր, ցավալի է մարտական ընկեր կորցնելը»:

Հարազատների պատմելով Սարգիսը դիրքեր բարձրանալուց հետո պարտադիր զանգել է մոր:  Վերջին անգամ մայրն ու հորեղբայրը  նրա հետ խոսել են ապրիլի 3-ին: Սարգիսը զոհվել է ապրիլի 4-ին: