Ձեր վստահելի աղբյուրը

Մշակույթի նախարար Արմեն Ամիրյանը վաղն իր մոտ զրույցի է հրավիրել բոլոր  այն մասնագետներին, ովքեր դեմ կամ կողմ կարծիքներ ունեն հայաստանյան հինգ քարանձավ վարձակալության տալուն:

«Պետք է հասկանամ, թե ինչն է մտահոգում այդ մարդկանց»,- լրագրողներ հետ հանդիպման ժամանակ ասաց նախարարը:

Ա. Ամիրյանի խոսքով, ցանկացած քարանձավի կամ պատմամշակութային հուշարձանի պատշաճ մակարդակով պահպանությունը, շահագործումը կիրականացնի, եթե այն օգտագործվի ճիշտ խաղի կանոններով և զբոսաշրջության զարգացման համար:

«Այսօր քարանձավները բացիթողի վիճակում են, որոշ մարդիկ ապօրինի տոմսեր են վաճառում, որպեսզի զբոսաշրջիկները ներս մտնեն: Ո՞վ է վերահսկում: Ոչ ոք: Չկա վերահսկողություն: Ո՞ւր են գնում այդ գումարները: Այդ քարանձավները սպասարկելո՞ւն, պահպանելո՞ւն: Ոչ: Այսօր կան քարանձավներ, զբոսաշրջություն, դրամաշրջանառություն: Թողնենք ապօրինի դրամաշրջանառություն լինի՞: Կարծում եմ՝ ոչ, պետք է կանոնակարգել»,-  նշեց նախարարը:

Ա. Ամիրյանն ասաց, որ ունենալով ճիշտ, հստակ պայմանագրեր, պայմանավորվածություններ, կկարողանան և վերահսկել, և ապահովել քարանձավների հետագա պեղումները, գիտական աշխատանքները, քարանձավների նշանակությունը բավարար հանրահռչկել աշխարհով մեկ:

«Մենք պետք է կանոնակարգենք այս դաշտը: Մրցույթը միտված է հենց դրան»,,- ընդգծեց նախարարը: