«Կան չգրված կանոններ, որոնք եթե պահպանվեն մարդկանց կողմից, կյանքը շատ ավելի հեշտ կլինի»
ՀՀ կենտրոնական բանկը, գործակցելով մի շարք ֆինանսական կառույցների հետ, հայտարարեց «Իմ ֆինանսների ամիս» 2017 ծրագրի մեկնարկը: Այն արդեն իրականացվում է չորրորդ տարին, նպատակը՝ հասարակության շրջանում անձնական ֆինանսների արդյունավետ կառավարման կարևորումն ու ֆինանսական կրթման մակարդակի բարձրացումն է։
Ծրագիրը նախատեսված է Երևանի և մարզերի բնակիչների համար, թիրախը տարբեր մասնագիտություններ ունեցող անձինքն են՝ աշակերտներ, ուսանողներ, ուսուցիչներ և այլք:
Լրագրողների հետ զրույցում Կենտրոնական բանկի Սպառողների շահերի պաշտպանության և ֆինանսական կրթման կենտրոնի ղեկավար Արմենուհի Մկրտչյանն ասաց, որ ԿԲ-ն ընդգծում է ֆինանսական կրթման կարևորությունը:
«Մեզ համար կարևոր է նաև գտնել նորարարական, ստեղծագործ, գրավիչ ուղիներ և գործիքներ՝ ֆինանսական կրթման մակարդակը հասարակության լայն շրջանում բարձրացնելու համար, հետևաբար այս տարի ևս իրականացում ենք ինչպես արդեն հասարակության կողմից սիրված, այնպես էլ նոր միջոցառումներ»,- նշեց նա:
«Իմ ֆինանսների ամիս» 2017 ծրագրի շրջանակում ապրիլի 19-ից 26-ը կազմակերպվող միջոցառումներին ներգրավվածները կմասնակցեն՝ ֆինանսական շրջագայության, որի ժամանակ կայցելեն ֆինանսական տարբեր կառույցներ, տարբեր ֆինանսական թեմաներով բաց սեմինարների, բանավեճերի մրցաշարի, միջհամալսարանական ինտելեկտուալ առաջնության, լուսանկարչական, նկարչական, ինֆոգրաֆիկայի և վերամշակման մրցույթների, փողի միջազգային շաբաթ ծրագրին, ֆինանսատնտեսագիտական խաղ-մրցույթին, ֆինանսական թեմաներով ակումբային քննարկումներին:
Նա տեղեկացրեց, որ ավելի քան 40 գործընկեր ունեն այս տարի, ֆինանսական կազմակերպությունների քանակն է ավելացել:
Հարցին, թե այս չորս տարիներին ինչքանո՞վ է ավելացել մարդկանց ֆինանսական կրթվածության մակարդակը, Ա. Մկրտչյանն ասաց. «Մենք ֆինանսական գիտելիքների առաջին չափումը իրականցրել ենք 2014 թվականին և քանակական տեսանկյունից ասել, թե ինչպիսի փոփոխություններ են տեղի ուենցել գիտելիքների և հմտությունների առումով, դժվար է: Մյուս պաշտոնական հարցումը կիրականացվի 2019 թվականին: Արձագանքներից հասկանում ենք, որ թեմայով հետաքրքրվածությունը մեծանում է, տրվող հարցերն ավելի հմուտ են և նուրբ երանգներ են պարունակում, միջոցառումներին մասնակցությունը ներգրավածությունն ավելի լայն է, ինչից հականում ենք, որ զգալի առաջընթաց կա»,-ասաց նա:
Հարցին, թե հիմնականում ի՞նչ հարցեր են բարձրացնում մասնակիցները, ԿԲ ներկայացուցիչն ասաց, որ դրանք հիմնականում վարկերի, պարտքերի կառավարման մասին են:
«Կան չգրված կանոններ, որոնք եթե պարզապես պահպանվեն մարդկանց կողմից, կյանքը շատ ավելի հեշտ կլինի, ավելի զերծ վտանգներից: Օրինակ՝ վարկի գումարը չպետք է լինի ամսական եկամուտի 30 տոկսից ավելին: Գիտնականները պարզել են, որ եթե 30 տոկոսից ավելին է, բարձր է հավանականությունը, որ մարդը կզգա ֆինանսական ճնշվածություն և էմոցիոնալ մակարդակով, և ֆինանսական առումով:
Կա խնայողությունների կանոն. ամսական եկամտի 10 տոկոսը պետք է խնայել ու նոր կատարել մնացած անհրաժեշտ ծախսերը: Մեզ մոտ միշտ հակառակն է լինում»,- ասաց Ա.Մկրտչյանը:
Կենտրոնական բանկի խորհրդի անդամ Արմենակ Դարբինյանը նշեց, որ ծրագրի միջոցառումները ուղղված են լինելու հանրության մոտ մի շարք գիտելիքների և հմտությունների ուժեղացմանը, ինչպես օրինակ կատարել արդյունավետ խնայողություններ, պլանավորել եկամուտները և ծախսերը, խուսափել պարտքի բեռից, ում դիմել:
Անցած տարի ծրագրին 5000 մարդ է մասնակցել: Այս տարի գրանցումների միտումից կազմակերպիչները հասկանում են, որ ամենաքիչը 7000 մասնակից կունենան:
Ծրագրի և ծրագրի մասնակցության վերաբերյալ մանրամասն տեղեկատվությունը տեղադրված է www.abcfinance.am կայքում, համանուն Ֆեյսբուքյան և Թվիթերյան էջում:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
