Ձեր վստահելի աղբյուրը

«Ամուսնության դեպքերի հանրապետական միջին հարաբերական ցուցանիշը 5,4  պրոմիլ է, միջին հանրապետականից բարձր ցուցանիշներ ունի Վայոց Ձորը՝ 7 պրոմիլ, հաջորդում է Երևանը՝ 6,1 պրոմիլ, այնուհետև Կոտայքը՝ 5,6 պրոմիլ»,-այսօր լրագրողների հետ հանդիպմանը հայտնեց Հայաստանի ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը՝ ներկայացնելով 2016 թվականի ցուցանիշները։


Նա նշեց, որ մնացած բոլոր մարզերում ամուսնության մակարդակն ավելի ցածր է՝ քան միջին հանրապետականը։ Ամենացածր ցուցանիշն արձանագրվել է Շիրակում՝ 4,3 պրոմիլ։

Անդրադառնալով ամուսնալուծության դեպքերին՝ Կույումջյանն ասաց, որ միջին հանրապետական ցուցանիշի՝ 1,2 պրոմիլի համեմատ ամենաբարձր ցուցանիշն ունի Լոռու մարզը՝ 2,4 պրոմիլ, սակայն  նախորդ տարիներին արձանագրված ցուցանիշից որոշակի նվազում կա Լոռիում, Երևանը կազմում է 1,5 պրոմիլ, իսկ մնացած բոլոր մարզերում միջին հանրապետականից ցածր է։

«Հայաստանում ներկայումս տղամարդկանց շրջանում ամուսնության միջին տարիքը 29.4 տարեկան է, իսկ տարիներ առաջ տղամարդիկ ընտանիք էին կազմում միջինը 25.5 տարեկանում: Կանանց պարագայում ամուսնության միջին տարիքը 22 տարեկանն էր, իսկ հիմա՝ 26.2: Կանանց 72-73%-ի պարագայում ամուսնության տարիքը 20-29 տարեկանն է, տղամարդկանց 65%-ի դեպքում՝ 25-30 տարեկանը»,- մանրամասնեց Կույումջյանը:

Ասուլիսին ներկա ընտանեկան հոգեբան Արկադի Մեհրաբյանն ամուսնալուծությունների պատճառներից առանձնացրեց իրավագիտակցության պակասը, իրավունքներն ու պարտավորությունները չիմանալը, չակերտավոր ազատությունները, մարդկային էգոն։

«Եվս մեկ պատճառ, որն ամենաքիչն է նշվում, դա  ոչ ճիշտ բաշխումն է։ Ինչ վերաբում է մեծ տարիքում ամուսնալուծություններին, ապա դրա հիմնական պատճառ է դառնում «դատարկ բնի» ճգնաժամը, երբ երեխաներն ամուսնանում ու հեռանում են»,-ասաց հոգեբանը։

Նրա խոսքով՝ մասնագետին դիմելու դեպքում դրական արդյունքներ են գրանցվում, երբ զույգն իր կամքով է դիմում, մնացած դեպքերում՝ հորդորով կամ ստիպելով մասնագետի հետ աշխատելու դրական արդյունքները ցածր են լինում։

Փաստաբան Տիգրան Սարուխանյանն էլ հավելեց, որ  իրավական առումով ամուսնալուծության պրոցեսը դյուրին է, մինչդեռ ինչպես հոգեբանը նշեց, այդտեղ մարդկային գործոնը բավականին մեծ դեր է խաղում։

«Նույնիսկ մի կողմի ցանկությունը բավարար է, որ դատական կարգով ամուսնալուծություն տեղի ունենա, որոշ եզակի բառացառություններից բացի»,-նշեց փաստաբանը։

Նա խորհուրդ տվեց անպայման եկեղեցու պսակադրությունից բացի մեծ ուշադրություն դարձնել ամուսնության իրավական կողմին և գրանցմանը։