Եվրոպան դեռ երկար է փորձելու Թուրքիայի «տամարը» բռնել. Լարիսա Ալավերդյան

Քաղաքական 12:08 19/04/2017 Տարածաշրջան

Թուրքիայում տեղի ունեցած սահմանադրական հանրաքվեն ԵԱՀԿ-ի կողմից արժանացավ կոշտ գնահատականների, ինչը շատ կարևոր ազդակ է, թե ուր է գնում այդ երկիրը: Lրագրողների հետ այսօր կայացած հանդիպման ժամանակ ասաց «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը:

«Երեկվանից կան լուրեր, որ ընդդիմությունը կազմակերպվում է՝ հնչեցնելու նույն դիտողությունները, ինչ ԵԱՀԿ-ն: Իրականում Թուրքիան առաջ է շարժվում շատ կոպիտ քայլերով: Սա անկանխատեսելի, բավականին հախուռն գործընթացներ է նշմարում: Եվրոպան դեռ երկար է փորձելու Թուրքիայի «տամարը» բռնել, սակայն այդ երկիրն այլևս իրեն կապված չի զգում Եվրոպային, ավելին Եվրոպային օգտագործելու է իր շահերի համար»,- ասաց նա:

Լարիսա Ալավերդյանի խոսքով, հարևան երկիրն իր քայլերում շատ հմուտ և խորամանկ է, ինչի պատճառով Հայաստանը պետք է ավելի սթափ լինի՝ հատկապես հարաբերությունների կարգավորման համատեքստում: Սա, նրա համոզմամբ, երկարատև գործընթաց է, որին պետք է նախորդի վստահությունը:

Անդրադառնալով Թուրքիայում մահապատժի հնարավոր վերականգնմանը՝ բանախոսը նկատեց՝ Եվրոպայի բացասական վերաբերմունքն այս երևույթին միանշանակ է, մինչդեռ ԱՄՆ-ն սրան դեմ չի արտահայտվում:

«Թուրքիան եղել և մնում է դաժանության ախտանիշ կրող երկիր»,- նկատեց բանախոսը:

Անդրադառնալով ՀՀ ԱԺ ընտրություններին՝ Լարիսա Ալավերդյանը շեշտեց՝ կոռուպցիան եղել և մնում է մարդու իրավունքների կոպտագույն խախտում: Վարչական ռեսուրսի կիրառումը ոչ այլ ինչ է, եթե ոչ ճնշում կամ բռնություն:

«Սրանք խայտառակ դրվագներ են, որոնք իշխանական կուսակցության կողմից դատապարտման չեն արժանացել: Հակառակը, եղել են խեղկատակության հասնող արդարացումներ»,- ամփոփեց նա:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: