Ձեր վստահելի աղբյուրը

2016 թվականին գրանցվել է 16294 ամուսնություն,-այսօր լրագրողների հետ հանդիպման ժամանակ ասաց Հայաստանի ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը՝ ամփոփ ներկայացնելով ամուսնությունների և ամուսնալուծությունների պատկերը Հայաստանում՝ անկախությունից մինչ օրս։

Նրա խոսքով՝ այս արդյունքները հիմնված են քաղաքացիական կացության գրանցումների վրա։

«Անկախության ժամանակահատվածի առաջին տասնամյակում ամուսնությունների ու ամուսնալուծությունների կտրուկ նվազում արձանագրվեց։ Եթե 1990-91 թվականներին մեր երկրում գրանցվում էր ավելի քան 28 հազար ամուսնություն, ապա 2001թվականին այդ ցուցանիշը հասավ շուրջ 11 հազարի, գրեթե 2,8 անգամ կրճատվեցին գրանցված ամուսնության դեպքերը։ Արդեն հաջորդ տասնամյակում ամուսնության դեպքերի ավելացում արձանագրվեց և այդ 11 հազարից հետո ամենաբարձր ցուցանիշը գրանցվեց 2011 թականին՝  հասնելով 19706»,- մանրամասնեց Կույումջյանը։

ԱՎԾ պաշտոնյան տեղեկացրեց, որ վերջին երեք-չորս տարիների ընթացքում կրկին ամուսնության դեպքերի նվազում է նկատվում։ Ինչ վերաբերում է ամուսնալուծություններին՝ ասաց, որ նշված ժամանակահատվածներում, համապատասխանաբար փոխվել են նաև ամուսնալուծությունների դեպքերը։

«Եթե 1991-ին ավելի քան 3800 ամուսնալուծության դեպք էր գրանցվել, ապա այդ ցուցանիշը մինչև 2001 թվականը հասել է 1300-ի։ Իսկ հաջորդող տարիներին ամուսնությունների աճին զուգահեռ ավելացել են նաև ամուսնալուծության դեպքերը։ Ամուսնալուծության ամենաբարձր ցուցանիշը գրանցվել է 2014 թվականին՝ 4496 դեպք, իսկ 2016  թվականին՝ 3648 դեպք»,-հավելեց ԱՎԾ մարդահամարի և ժողովրդագրության բաժնի պետը։