Ձեր վստահելի աղբյուրը

ՀՀ տնտեսական զարգացման և ներդրումների նախարարությունում տեղի ունեցավ նախարարության  և Սյունիքի Ազատ տնտեսական գոտու կազմակերպիչ ընկերության հետ պայմանագրի ստորագրում: Այն ստորագրեց ՀՀ տնտեսական զարգացման և ներդրումների նախարար Սուրեն Կարայանը և «Սյունիք ազատ տնտեսական գոտի» ՍՊԸ տնօրեն Էդուարդ Ղուկասյանը:

Պայմանագրում արտացոլված են ազատ տնտեսական գոտու (ԱՏԳ) կազմակերպման, ենթակառուցվածքների ստեղծման և զարգացման, կազմակերպչի կողմից ծառայությունների մատուցման, այդ ծառայությունների սակագների սահմանման, ներդրումների իրականացման, ԱՏԳ շահագործողների ներգրավման, լիազոր մարմնի կողմից վերահսկողության իրականացման արդյունքում առաջացող և ԱՏԳ գործունեության հետ կապված այլ իրավահարաբերություններ:

Լրագրողների հետ հանդիպմանը  տնտեսական զարգացման և ներդրումների նախարարի տեղակալ Հովհաննես Ազիզյանն ասաց, որ կազմակերպչի կողմից առաջին փուլում կիրականացվի շուրջ 10 միլիոն դոլարի ներդրում, իսկ ազատ տնտեսական գոտում գործունեության ընթացքում ակնկալվում է, որ կներգրավվեն շուրջ 120 շահագործող ընկերություններ, որոնք կիրականացնեն 350-400 միլիոն դոլարի ներդրում, կստեղծեն ավելի քան 2500 նոր աշխատատեղեր, իսկ միջին տարեկան արտահանումը կկազմվի շուրջ 80-100 միլիոն դոլար:

Պայմանագրի ստորագրումից հետո «Սյունիք ազատ տնտեսական գոտի» ՍՊԸ խորհրդի նախագահ, Առևտրաարդյունաբերական պալատի ներդրումային հանձնաժողովի նախագահ  Սարգիս Աղաբեկյանը լրագրողների հետ զրույցում ասաց, որ գոտին նախաձեռնվել է Առևտրաարդյունաբերական պալատի կողմից շուրջ 3 տարի առաջ, հիմնական խնդիրն է՝ մեծացնել Հայաստանում ներդրումների ծավալը, ՀՀ-ից ապրանքների և ծառայությունների արտահանումային ներուժը:

«Գոտին, ըստ էության, հնարավորություն է տալիս մեզ, որպեսզի  ԵԱՏՄ-ի  և Իրանի միջև ապրանքաշրջանառության ծավալներն  էական մեծացենք, միաժամանակ այսօր ռուսական, Մաքսային միության բիզնեսը բազմաթիվ խնդիրներ ունի  Իրանի հետ ապրանքաշրջանառության ծավալների հետ կապված զուտ կոմունիկացիաների բացակայության պատճառով:

Գոտին կարևոր է նրանով, որպեսզի մենք արտադրողական հզորություններ ներգրավենք Մաքսային միության երկրներից, Իրանից դեպի ազատ գոտի, ստեղծենք աշխատատեղեր, բարելավենք Սյունիքում ենթակառուցվածքների զարգացումը, մեծ ուշադրություն դարձնենք սահմանամերձ գոտիների համաչափ զարգացմանը»,- ասաց Ս. Աղաբեկյանը:

Նա տեղեկացրեց, որ այսօր հստակ պայմանավորվածություն ունեն իրանական մի ընկերության հետ. «Խոսքը գնում է բեռնատար մեքենաների կամ մեքենաների հետ կապված որոշակի մասեր արտադրելու մասին»:

Ս. Աղաբեկյանն ասաց, որ նաև կառավարությունն ընդառաջ գնալով շահագործողին, այնպիսի պայմաններ է ստեղծել, որ այնտեղ կարելի է ցանկացած գործունեություն  իրականացնել, այսինքն ոչ թե միայն արտադրություն, նաև առևտուր, սպասարկման ոլորտ, հյուրանոցային բիզնես, ստեղծել զվարճանքի վայրեր. «Մեր խնդիրն է բարենպաստ պայմաններ ստեղծել Հայաստան կապիտալների հոսքն ապահովելու համար: Իհարկե, ողջունում ենք կառավարության մոտեցումը, որ կոնկրետ գործունյա քայլով ստեղծվեց հստակ մեխանիզմ նշված խնդիրները լուծելու համար»:

Հարցին, թե ի՞նչ ապրանքներ են երկկողմ հետաքրքրություն ներկայացնում, նա ասաց, որ բազմաթիվ են՝ գյուղմթերքների վերամշակում, ջրերի շշալցում, մինչև սարքավորումների արտադրություն, պահեստներ: Նրա խոսքով, լոգիստիկայի հետ կապված  այստեղ մեծ առավելություններ ունեն:

Պատասխանելով հարցին, թե ի՞նչ չափով կէժանանան ապրանքները,  Ս. Աղաբեկյանն ասաց, որ մոտ 25-27 տոկոս զուտ ինքնարժեքի տեսակետից ավելի էժան  ապրանք կունենան, մրցակցային առումով բավական էական է՝ հաշվի առնելով այն հանգամանքը, որ շատ արտադրողներ 10-12 տոկոս շահութաբերությամբ են աշխատում:

«Ինքնարժեքի մեջ կարևորագույն կոմպոնենտներից մեկը էներգիան է: Էներգակիրների՝ հոսանք,  գազ և այլն, առումով ունենում ենք բացարձակապես մրցողունակ գին, շատ ու շատ արտադրատեսակներ ունենում են բացառիկ մրցակցություն: Օրինակ՝ ինչո՞ւ  է Իրանից Մաքսային միության երկրներ արտահանվող պոմիդորը, վարունգը կամ այլ ապրանքներ ավելի էժան, որովհետև էներգակիրներն են էժան, բնականաբար ինքնարժեքը շատ ավելի ցածր է ստացվում»,- նշեց նա: 

«Սյունիք ազատ տնտեսական գոտի» ՍՊԸ խորհրդի նախագահն ասաց, որ վաղվանից արդեն կսկսեն նախագծման աշխատանքները, ցանկանում են մինչև հոկտեմբերի 15-ն ավարտել: Կառավարության կողմից վերջնաժամկետը մեկ տարի է:

«Տվյալ ծրագրի դեպքում գոյություն ունի Առևտրաարդյունաբերական պալատ, տնտեսավորղ սուբյեկտ, պետություն փոխհարաբերությունները: Մեր երրորդ հանրապետության պատմության մեջ  չգիտեմ դեպք, որ գործարար համայնք-պետություն-առանձին պատասխանատու տնտեսվարող սուբյեկտը միասին, համատեղ փորձեն տևական ժամանակահատվածում՝ 50 տարում, ծրագիր իրականացնեն, որը կարող է մակրոտնտեսական, միկրոտնտեսական բավականին մեծ նշանակություն ունենալ թե տարածաշրջանի համար՝ կոնկերտ Սյունիքի, թե Իրանի հետ ապրանքաշրջանառության ծավալների մեծացման, թե մեր հասարակության սոցիալական վիճակի բարելավման համար»,- ասաց Ս. Աղաբեկյանը: