Ձեր վստահելի աղբյուրը

«Չեմ կարծում, որ ագզ-բանակը ժամանակի հետ կապված կոնցեպտ է, չեմ կարծում, որ ղարաբաղյան հակամարտության հետ կապված հայեցակարգ է:  Հասարակության ինքնակազմակերպման ձև է»,- Երևանի Կ. Դեմիրճյանի անվան մարզահամերգային համալիրում կայացած «Ազգ-բանակ-2017» խորագրով համաժողովին «Ազգ-բանակ. անվտանգության բանաձև» թեմայով քննարկմանն ասաց ՀՀ պաշտպանության նախարար Վիգեն Սարգսյանը:

Նրա խոսքով, Հայաստանի պարագայում, երբ բավականին խորն արմատներ ունեցող հասարակություն է, որը դարեր շարունակ չի ունեցել պետականություն, ուղղակի փրկօղակ է դեպի պետություն և պետականություն՝ նոր մոտեցումներ, դիրքորոշում  ձևավորելու առումով:

«Մենք ունենք իրականություն, եթե չանվանենք էլ ազգ-բանակ, միևնույնն է՝ ազգ-բանակ ենք, երբ որ ամեն 40-րդ քաղաքացին զինծառայող է,  աշխատունակ  ամեն 5-6 –րդ տղամարդը: Շատ մեծ թիվ է»,-  հավելեց նախարարը:

Վ. Սարգսյանն ասաց, որ բանակը պատրաստ է այս գաղափարին, ավելին՝ բանակին այդ գաղափարի լիարժեք իրագործումը չափազանց կարևոր է: Նախարարի խոսքով, այսօր շատ կարևոր է բանակի նկատմամբ ունեցած սերը վերածել հարգանքի, որի միակ ճանապարհը խորը վստահությունն է:  

«Սիրո զգացումը շատ կարևոր է: Լավ է, որ  ողջ հասարակությունը մեծարում է սահմանին կանգնած զինվորին: Բայց հանրային դիսկուրսի մեջ բացակայում է սպան, հրամանատարը: Այնպիսի տպավորություն է, որ 18-20 տարեկան տղան ոչ թե ի շնորհիվ, այլ ի հակառակ բանակի, ողջ կառույցի կարողացել է իր  սխրանքով կանգնեցնել հակառակորդին, փոխել վիճակը: Այն, որ մեր զինվորն անկախության սերնդի բացառիկ դրսևորում է, զորակոչվում է բանակ բացարձակ նոր ախարհընկալմամբ, անվիճելի է, բայց անվիճելի է  նաև մի բան՝ ամենալավ զինվորը, լցված հայրենասիրությամբ, ոգևորությամբ, եթե չստանա համապատասխան կրթության, պատրաստություն, չունենա համապատասխան կազմակերպվածություն իր զորմաասում, որը սպայի ուսերին է, երբեք չի կարող արդյունավետ լինել»,- ասաց Վիգեն Սարգսյանը: