«Ազգ–բանակ» հայեցակարգի ներդրումը ենթադրում է հասարակության և ԶՈՒ միջև որակապես նոր մակարդակի փոխգործության ձևավորում. Հ.Քոթանջյան
Երևանի Կ. Դեմիրճյանի անվան մարզահամերգային համալիրում կայացած «Ազգ-բանակ-2017» խորագրով համաժողովին «Ազգ-բանակ. անվտանգության բանաձև» թեմայով քննարկման ժամանակ ՀՀ ՊՆ Պաշտպանական ազգային հետազոտական համալսարանի պետ, քաղաքական գիտությունների դոկտոր, պրոֆեսոր, գեներալ-լեյտենանտ Հայկ Քոթանջյանը հանդես եկավ զեկույցով՝ «Պաշտպանական ազգային հետազոտական համալսարանը` որպես «Ազգ-բանակ» համակարգի առաջավար-ռազմավարագետների աճեցման գիտակրթական հենք» թեմայով։
«Հայաստանի Հանրապետության համար առկա ռազմական սպառնալիքների և դրանց հաղթահարման ռեսուրսների հաշվեկշռի վերլուծությունը ցույց է տալիս, որ պաշտպանական համակարգի հետագա զարգացման հիմքում պետք է դրվեն նորամուծական հայեցակարգային գաղափարները և կիրառվեն համազգային պաշտպանության ամենաարդիական միջոցները, որոնք համահունչ լինեն Հայաստանի դաշնակիցների ու գործընկերների պաշտպանական-անվտանգային մտքի և տեխնոլոգիաների զարգացումներին: Նման ռազմավարական տրամաչափի գաղափար է «Ազգ–բանակ» հայեցակարգը, որի ներդրումը ենթադրում է հասարակության և Զինված ուժերի միջև որակապես նոր մակարդակի ու խորության փոխգործության ձևավորում»,-իր ելույթում նշեց Քոթանջյանը:
Այս համատեքստում բանախոսը հարկ համարեց կարևորել Պաշտպանության նախարարի հանձնարարությամբ համալսարանում վերջերս կատարված «Ազգ-բանակ» հայեցակարգի մենագրական մշակումը` այժմեական թվային տեխնոլոգիական հեղափոխության պայմաններում ավանդական հայոց աշխարհազոր երևույթի արդիականացմամբ. «Ինքնին հասկանալի է, որ նման նորամուծական փոխգործության արդյունավետ ծավալման համար առաջնահերթություններ են համապատասխան գիտելիքներով ու հմտություններով օժտված ղեկավար կադրերի անընդհատ կրթումն ու վերապատրաստումը: Եվ պատահական չէ, որ Հայաստանի Հանրապետության ռազմաքաղաքական ղեկավարությունը անկախության առաջին տարիներից սկսած իր ուշադրության կենտրոնում է պահել և պահում ռազմակրթական համակարգի ձևավորման ու զարգացման հարցերը»:
«Այդ քաղաքականության շրջանակներում ՀՀ Պաշտպանության նախարար, ներկայումս ՀՀ գործող Նախագահ Սերժ Սարգսյանը հանձնարարել էր ԱՄՆ-ի Պաշտպանական ազգային համալսարանում գիտական ստաժավորումների միջոցով ծանոթանալ ԱՄՆ-ի բարձրագույն ռազմաքաղաքական ղեկավարությանն իր գիտական հետազոտությունների արգասիքներով սնուցող և ղեկավարության բարձրագույն օղակի միջգերատեսչական անվտանգային կրթությունն ապահովող այդ գիտակրթական հաստատության գործունեության սկզբունքներին և մշակել դրա մոդելի տեղայնացմամբ Հայաստանում քույր կազմակերպության ստեղծման նախագիծը: Այդ բազմափուլ ծրագրով է Հայաստանի պաշտպանության նախարարության համակարգում հիմնադրվել Ազգային ռազմավարական հետազոտությունների ինստիտուտը:
Իր գործունեության ընթացքում Ինստիտուտը՝ որպես ապագա Պաշտպանական ազգային հետազոտական համալսարանի գիտական հիմնասյուն, քայլեր է ձեռնարկել Հայաստանում պաշտպանական-անվտանգային հետազոտությունների համար անհրաժեշտ որակավոր մասնագիտական միջավայրի ստեղծման ուղղությամբ: Տվյալ գիտական կառույցի հետազոտությունները միտված են ապագայում դառնալու ղեկավար կադրերի անվտանգային կրթության նորամուծական հենքը, իսկ հետազոտողների կազմը` պրոֆեսորադասախոսական թիմի մտավոր միջուկը:
Այս նպատակով վերջին տարիներին հիմնվել են ապագա Հետազոտական համալսարանում դասավանդվող ռազմավարական գիտելիքն արտադրող, համակարգող և հրապարակող գործիքներ՝ ռազմավարական հետազոտությունների «Աշխատանքային տետրեր» գիտակիրառական հանդեսը, որում հրապարակվում են ԱՌՀԻ-ի մասնագետների համադասմամբ և առաջատար հայրենական ու արտասահմանյան փորձագետների ներգրավմամբ կատարված տարածաշրջանային և ֆունկցիոնալ հետազոտությունները ներկայացնող կոլեկտիվ մենագրությունները, Հայաստանի պաշտպանության նախարարության համակարգում առաջին ասպիրանտուրան և քաղաքական գիտությունների գծով թեկնածուի ու դոկտորի գիտական աստիճաններ շնորհող՝ հանրապետությունում առաջին մասնագիտական խորհուրդը»,-նշեց բանախոսը:
Նրա կարծիքով, հետազոտական բաղադրիչի հաջորդական զարգացմանն է միտված մեր Ազգային ռազմավարական հետազոտությունների ինստիտուտի կազմում ԱՄՆ-ի Պաշտպանական ազգային համալսարանի գործակցությամբ ռազմավարական խաղերի և կիբեռանվտանգության խմբերի ստեղծումը. «Ռազմավարական խաղերի խմբի ստեղծման նպատակներից է տարածաշրջանային անվտանգության տուրբուլենտ դինամիկայի կանխատեսումներում բարձր մակարդակի անորոշությունների պարագայում պաշտպանական համակարգում կատարվող հետազոտությունների արդյունքների ճշգրտության մակարդակի բարձրացումը նորամուծական վերլուծական մեթոդների կիրառման շնորհիվ: Միևնույն ժամանակ, այդ խմբի ստեղծումը նպատակաուղղված է ապագա կրթական գործունեությունում ուսուցման նորամուծական, մասնավորապես՝ ռազմավարական խաղերի և անվտանգային զարգացումների դժվարկանխատեսելի դինամիկայի սցենարային վերլուծության մեթոդների ներդրմանը»:
Քոթանջյանի խոսքով, կիբեռանվտանգության խմբի գործունեության կարևոր արգասիքներից է Ազգային անվտանգության ռազմավարության նորացման շրջանակներում Կիբեռանվտանգության ազգային ռազմավարության նախագծի մշակումը, մի փաստաթղթի, որն արդեն հաջողությամբ գիտական փորձաքննություն է անցել ԱՄՆ-ի Պաշտպանական ազգային համալսարանի Տեղեկատվական ռեսուրսների և կիբեռտարածության կառավարման քոլեջում:
Ինչ վերաբերում է Համալսարանի գործունեության կրթական բաղադրիչին, ապա այնտեղ, նրա խոսքով, ինտենսիվ աշխատանքներ են տարվում 2017 թ. սեպտեմբերից միջգերատեսչական և գերատեսչական ձևաչափով վերապատրաստման պիլոտային դասընթացների կազմակերպման ուղղությամբ: Դրանց հիմքում ՆԱՏՕ-ից, ՀԱՊԿ-ից, Միացյալ Նահանգներից և Ռուսաստանից խորհրդատուների մասնակցությամբ անցկացվող Պաշտպանության ռազմավարական վերանայման արդյունքների հաշվառմամբ դրվում է ՀՀ պաշտպանության նախարարության, ՀՀ ԶՈՒ-ի Գլխավոր շտաբի և ռազմական անվտանգության ասպարեզում մեզ հետ գործակցող առաջատար մասնագետների՝ Պաշտպանական համակարգի բարեփոխմանն ուղղված հետազոտությունների արգասիքը: Պլանավորվում է հետագայում այդ դասընթացների հենքի վրա մշակել Հայաստանի Հանրապետության ապագա սերնդի ռազմավարական առաջավարների պաշտպանական-անվտանգային պատրաստման մագիստրոսական ծրագրերը:
«Մեր Համալսարանում ռազմավարական պաշտպանական-անվտանգային կրթության կազմակերպմամբ կամբողջացվի Հայաստանում իրականացվող ռազմակրթական բարեփոխումների գործընթացը` արդի անվտանգային մարտահրավերներին արդյունավետ կերպով դիմակայելուն ունակ կադրեր պատրաստող և մարտավարականից մինչև ռազմավարական մակարդակը ներառող ռազմակրթական համակարգի ձևավորմամբ»,-եզրափակեց պրոֆեսորը:
Հարակից հրապարակումներ`
- Մենք պարտադրված ենք ունենալու ռազմական գործին տիրապետող ազգաբնակչություն. Օնիկ Գասպարյան
- Վիգեն Սարգսյան. «Ազգ-բանակ»-ը հասարակության ինքնակազմակերպման ձև է
- Մեր բանակի առկայությունը պարտավորեցնում է այլ համակարգերին ևս բարձրանալ. Արմեն Մուրադյան
- Վ. Հարությունյան. Ի շնորհիվ սպայի, հասարակության մոտիվացիայի, կարողանում ենք ապահովել մեր անվտանգությունը
- ԿԳ նախարարի առաջարկը՝ ռազմագիտության դասավանդման վերաբերյալ
- «Ազգ-բանակը» մեր գոյության իրավունքը պաշտպանելու հայեցակարգ է. Արմեն Ռուստամյան
- Ավելի բարձր մասնագիտություն, քան սպայինն է, չկա. Լևոն Մկրտչյան
- Վիգեն Սարգսյանը հանրային քննարկման ներկայացրեց առաջնագծում զինծառայության «Ես եմ» ծրագիրը
- «Ազգ-բանակ» հայեցակարգի ներքո շրջանառության մեջ դրվեց երկու նոր նախագիծ՝ «Պատիվ ունեմ», «Ես եմ»
- ՀՀ նախագահ. Հանձնարարել եմ, անհապաղ քայլեր ձեռնարկել զոհված զինծառայողների ընտանիքներին բնակարանով ապահովելու համար
- ՀՀ նախագահ. Անհրաժեշտ են համալիր հարցադրումներ, մոտեցումներ ու լուծումներ
- Սերժ Սարգսյան. Մեզ պետք են լիարժեք մարդիկ, երկրի տերեր
- Մեկնարկել է «Ազգ-բանակ-2017» խորագրով համաժողովը
- Բագրատ Սրբազան. Մեր զինվորները ոչ թե հայրենասեր են, այլ հայրենատեր
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
