Ձեր վստահելի աղբյուրը

Վերաքննիչ քրեական դատարանն Արցախի պաշտպանության բանակի նախկին հրամանատար Սամվել Բաբայանի փաստաբանի բողոքի վերաբերյալ որոշումը կհրապարակի վաղը։  Այսօր բողոքի քննությունից հետո լրագրողների հետ զրույցում ասաց Ս. Բաբայանի փաստաբան Ավետիս Քալաշյանը:

Հիշեցնենք, որ փաստաբանը դիմել էր Վերաքննիչ դատարան՝  բողոքարկելով Ս. Բաբայանի նկատմամբ երկամսյա կալանք կիրառելու մասին Երևանի Կենտրոն և Նորք- Մարաշ վարչական շրջանների ընդհանուր իրավասության դատարանի որոշումը:

Նա նշեց, որ դատարանում ելույթ է ունեցել Սամվել Բաբայանը, ով ասել է, որ «ումից կամ ինչից պետք է փախնի, ինչ է արել, որ փախնի, ոչ մի նման արարք չի կատարել, ոչնչով մեղավոր չէ», իր նկատմամբ կալանավորումն անհիմն է, խնդրել է կայացնել արդարացի որոշում՝ վերացվի կալանավորման որոշումը, քաղաքական հայտարարություն չի արել:

«Դատախազը, քննիչն էլ  առարկեցին այն հիմքով, որ գտնում են առաջին ատյանի դատարանի որոշումը օրինական է և հիմնավոր»,- ասաց Ա. Քալաշյանը:

Նա տեղեկացրեց, որ այս ընթացքում Սամվել Բաբայանի նկատմամբ մեկ քննչական գործողություն է կատարվել, նրա դեմ ցուցմունք չկա:

Պատասխանելով լրագրողի հարցին, թե դուք այսօր շարունակո՞ւմ եք պնդել ձեր մոտեցումը, որ Սամվել Բաբայանը քաղաքական բանտարկյալ չէ, փաստաբանն ասաց. «Նորից եմ պնդում, ես՝ որպես փաստաբան, այս հարցին նայում եմ զուտ քրեաիրավական հարթության մեջ: Ես դեռևս որևէ հիմք չունեմ քաղաքական տեսք տալու այս հարցին»: