Ձեր վստահելի աղբյուրը

«Ազգ-Բանակ գաղափարախոսությունը ամրագրված է մեր անկախության առաջին իսկ օրվանից, եթե ուզում ենք ունենալ սուվերեն, անկախ պետականություն, այս տարածաշրջանում ուրիշ ձևաչափ չենք կարող ունենալ, քան այս մոդելը»,- Երևանի Կ. Դեմիրճյանի անվան մարզահամերգային համալիրում «Ազգ-բանակ-2017» խորագրով համաժողովի՝ «Ռազմական կրթության հեռանկարները» խորագրով նիստի ժամանակ ասաց ՀՀ կրթության և գիտության նախարար Լևոն Մկրտչյանն՝ անդրադառնալով հարցին, թե արդյոք մեր կրթական համակարգը պատրաստ է Ազգ-Բանակ հայեցակարգին:

Նախարարի խոսքով՝ մեր երկրի փոքրությունը երկու կարևոր նախապայմանի հիմք է դառնում. «Մեր երկրի տարածքը փոքր է, չունի թիկունք և սահման հասակացություն, և մեր ամենակենտրոնական տեղից մինչև սահման ընդամենը, մի քանի տասնյակ կիլոմետր է, ուրեմն՝ մենք ապրում ենք մի տարածքում, որտեղ բոլորս պոտենցիալ զինվոր ենք: Սա ենթադրում է մեր ամբողջ գաղափարախոսության ձևաչափը, ինչը բնականաբար պետք է գա կրթական համակարգից, քանի որ կրթության համակարգը գործիք է, որն ապահովում է տվյալ տեսակի շարունակությունը: Այդ իմաստով մենք ուղղակի այլընտրանք չունենք, քան մեր դպրոցում, մեր կրթական որակի մեջ գերակա կոմպոնենտ ունենալ ազգ-բանակ հիմնադրույթը»:

Մկրտչյանն ընդգծեց, որ ժողովուրդը պետք է պատրաստ լինի պաշտպանելու իր բնակավայրը, իր հայրենիքը և պետք է հասկանա, որ այդ հայրենիքը չունի հեռավոր մաս, չունի մոտակա մաս, այսինքն՝ Երևանում մենք նույն վիճակի մեջ ենք, ինչ սահմանմերձ շրջաններում. «Մենք տեխնիկապես  դրան պատրաստ ենք, դպրոցներում ունենք ժամաքանակներ, դրա իմաստով մենք խնդիր չունենք: Մենք խնդիր ունենք այդ գաղափարախոսությունը տեղակայելու դպրոցական կրթակարգի մեջ: Մեծ ուշադրություն դարձնենք դասագրքերի բովանդակությանն ու գործնական պարապմունքներին և որ համապատասխան առարկաները դառնան գրավիչ երեխաների համար»:

Նախարարը նշեց, որ դպրոցներում շաբաթական մեկ ժամ Նախնական ռազմական պատրաստություն առարկան կա դպրոներում, ինչը, նրա խոսքով այդքան էլ արդյունավետ չի ընթանում:

«Ուսուցիչը մտնում, ներկա-բացակա է անում, մի փոքր նյութ տալիս և դասընթացը վերջանում է: Միգուցե այդ 3-4 դասը շաբաթվա ընթացքում միավորենք, ամիսը մեկ անգամ ունենանք ռազմագիտության օր՝ յուրաքանչյուր դասարանի համար, որը դպրոցի բակում կքայլի, ավտոմատ կքանդի-կհավաքի, այդ օրը կդառնա ֆիզկուլտուրայի ու ռազմագիտության օր, ամբողջ օրը դասարանը կզբաղվի դրանով: Այսպես կենտրոնացնելով՝ կարելի է արդյունք ստանալ տվյալ առարկայից»,-առաջակեց Լևոն Մկրտչյանը:

ՀՀ նախագահի խորհրդական Տեր Մեսրոպ քահան Արամյանն էլ հավելեց. «Դպրոցը պետք է պատրաստի այնպիսի քաղաքացիներ, որոնք պատրաստ են ապագայի պատասխանատվություն ստանձնելու, զոհաբերության գնալու, հայրենիք պաշտպանելու և այլն: Այսինքն՝ ազգային դպրոցի գաղափարը հենց ազգ-բանակն է»: