Ձեր վստահելի աղբյուրը

Տոնավաճառների աշխատակիցները բողոքի ակցիա են իրականացնում կառավարության շենքի դիմաց: Նրանք պարզաբանումներ են պահանջում՝ ՊԵԿ-ի ստուգումների մասին: Ակցիայի մասնակիցներն անհասկանալի են համարում նման ստուգումները, նշում են, որ ստուգումների պատճառով հաճախորդներ են կորցնում:

Ասում են՝ եթե խոշորին են ցանկանում ցավ պատճառել, ուրեմն սխալ հասցեով են եկել:

«Երբ մեզ հետ խոսում են հարկայինի աշխատակիցները, մենք չենք  նեղանում, մենք վատ ենք զգում, որ մեր հաճախորդներին են նեղացնում: Նրանք մեզ գումար են պարտք, ապրանքը նիսյա տվել ենք, տարել են ծախել, հետո պետք է բերեն տան»,-ասաց ակցիայի մասնակիցներից մեկը:

Նրանք համոզված են՝ խնդրին լուծում չտալու դեպքում իրենց շարքերն ավելի ստվար են դառնալու: Բողոքի ակցիայի մասնակիցները կառավարության ղեկավարից պահանջում են. «Հայտարարեք, որ մեզ հարկային մարմինները տեռորի չեն ենթարկի, մենք այստեղից ուրախ-զվարթ կգնանք: Եթե խնդիրը լուծում չստանա, հրապարակից չենք հեռանա»:

Վարչապետի օգնականներից մեկը նրանց առաջարկել է տասը հոգանոց խումբ կազմել ու հանդիպել ՊԵԿ ներկայացուցիչների հետ: Բողոքողները մերժեցին առաջարկը՝ պահանջելով հանդիպում անմիջապես կառավարության ղեկավարի հետ:

Ավելի ուշ նրանց հետ հանդիպման իջավ կառավարության նամակների բաժնի պետ Ալեքսանդր Ղազարյանը:

«Լավ եք արել, եկել եք: Փողոցում հարցը չի քննարկվում: Առաջարկում եմ հանդիպել վարչապետի օգնականի հետ»,-ասաց Ղազարյանը:

Հավաքվածները համաձայնեցին, որ երեք հոգանոց խումբը ներս մտնի ու հանդիպի վարչապետի օգնականին: Այս պահին հանդիպումը դեռ չի ավարտվել:

Հիշեցնենք, որ ավելի վաղ արձագանքել էր ՊԵԿ-ը՝ հայտարարելով, որ բողոքի ակցիան ուղղորդված է: