Ձեր վստահելի աղբյուրը

««1000 դրամ»-ի նախագծով փոխհատուցում տրամադրվել է 2 զոհվածի ընտանիքի: Բացի միանվագ գումարից ստանում են նաև իրենց ամսական գումարը»,- լրագրողների հետ հանդիպման ժամանակ ասաց պաշտպանության նախարար Վիգեն Սարգսյանը:

Նրա  խոսքով, եկող շաբաթ ևս 2-3 ընտանիք կստանա փոխհատուցում:

Փոխհատուցումների ձգձգումը Վիգեն Սարգսյանը կապում է իրավական գործընթացների հետ. «Օրենքը հստակ սահմանում է, թե որ դեպքում է այդ փոխհատուցումը հասնում տվյալ զոհվածի ընտանիքին  կամ հաշմանդամություն ստացած զինծառայողին: Կան բազմաթիվ հանգամանքներ, որոնք կարող են հստակեցվել դատական  գործն ավարտելուց հետո: Զոհվելու դեպքերի հետ կապված հարուցվում են  քրեական գործեր՝ տարբեր հիմքերով: Մինչև քրեական գործը չավարտվի, պաշտպանության նախարարության  վիճվարչությունը չի կարող որոշում կայացնել, որ սա  ապահովագրվող դեպք է: Պետք է ունենա իրավական հիմք»:

Միաժամանակ նա նշեց, որ որևէ զոհվածի կամ վիրավորվածի ընտանիք նախարարության ուշադրությունից դուրս չի մնում. «Այսինքն, եթե այդ հիմնադրամի գումարն իրեն հասնի մեկ ամիս հետո էլ, այդ ընթացքում մենք իրենց աջակցություն տրամադրում  ենք:  Մեր նպատակը ձգելը չէ, բայց կա իրավական ձևակերպման խնդիր, անպայման այդ փուլը պետք է անցնի»:

Վիգեն Սարգսյանն անդրադարձավ նաև նախագահ Սերժ Սարգսյանի երեկվա հանձնարարականին՝ «անհապաղ գործուն քայլեր ձեռնարկել զոհված և առաջին կարգի հաշմանդամ զինծառայողների ընտանիքներին բնակարանով ապահովելու համար»:

Նախարարն ասաց, որ խնդիր է դրվել մինչև 2019 թվականի ավարտն ամբողջությամբ լուծել այդ հարցը: 

«Պաշտպանության նախարարությունն ունի այդպիսի ծրագիր, որոշ տարիներ եղել է ակտիվ, որոշ տարիներ այդ գործընթացն ավելի դանդաղ  է ընթացել: Կարծում եմ, որ մենք պետք է բոլոր ջանքերը դնենք զոհված ազատամարտիկների ընտանիքների համար բնակարանային խնդիրը կարգավորելու համար: Մեծ աշխատանք կա անելու: Երկար տարիներ կատարվել է հերթագրում, բայց երբևէ այդ հերթագրումը բավականաչափ լիրաժեք չի ուսումնասիրվել, դժվարանում եմ ցուցակների որակը գնահատել: Զուգահեռ պետք է անենք այդ աշխատանքը և ռեսուրսների համապատասխան բաշխումը»,- ասաց Վ. Սարգսյանը:

Բնակարանյին խնդրի հետ երկրորդ հանձնարարականը, նախարարի ներկայացմամբ, վերաբերում է ՊՆ ծառայողական բնակֆոնդին. «Մենք ունենք ծառայողական բնակարանների ֆոնդ  Հայաստանի ողջ տարածքում, որի գրեթե կեսը գտնվում են զորամասերից դուրս՝ քաղաքացիական միջավայում: Այդ բնակֆոնդում բնակվում են մեր սպաները: Շատ անգամ, երկար տարիներ ապրելով, օրենքով  ձեռք են բերում  բնակարան ստանալու փոխհատուցման իրավունք , բայց քանի որ ապրում են ծառայողական բնակարանում և լրացուցիչ ռեսուրսներ չծախսելու համար, ավանդույթն այն էր, որ իրենք շարունակում էին այնտեղ ապրել, բայց սեփականաշնորհումը չէր ձևակերպվում: Ունենք մոտ 1200 բնական, որտեղ ապրում են սպայական ընտանիքներ կամ ընտանիքներն այն սպաների, ովքեր արդեն զորացրվել են: Նրանք  չունեն սեփականության իրավունք այդ բնակարանի նկատմամբ, որը, մեր պատկերացմամբ, սահմանփակում է իրենց ազատությունները, իրավունքները: Մինչև այս տարվա վերջ գոնե կեսն այդ բնակարանների կսեփականաշնորհվեն և մարդիկ կկարողանան լիարժեք տնօրինել»: