Ձեր վստահելի աղբյուրը

«Այս պահին վիճակը հանգիստ է, առավոտյան զեկույցի համաձայն առանձնահատուկ լարում չկա»,-լրագրողների հետ հանդիպմանն ասաց պաշտպանության նախարար Վիգեն Սարգսյանը՝ պատասխանելով հարցին, թե նախօրեին հակառակորդը կրակել է հայկական Բաղանիսի պետական նշանակության ճանապարհի ուղղությամբ, ինչպիսի՞ն է վիճակն այս պահին: 

Նրա խոսքով, պարբերական են լինում այդ դեպքերը, պատասխաններն էլ պարբերական են:

«Չենք կարծում, որ լավ ճանապարհ է, մենք ելնում ենք նրանից, որ զինադադարի պայմանագիրը պարտադիր է կողմերի համար: Յուրաքանչյուր խախտում պետք է քննադատվի միջազգային հանրության, համանախագահների կողմից: Մենք այս պահին բավարարված չենք արձագանքից»,- ասաց նախարարը:

Վ. Սարգսյանը նշեց, որ  վերջին մի քանի շաբաթը հարաբերական հանգիստ է, ավելի փոքր թվով խախտումներ են արձանագրվում:

Խոսելով  ՀԱՊԿ քարտուղարի պաշտոնում Հայաստանի ներկայացուցիչ Յուրի Խաչատուրովի նշանակման մասին, Վ. Սարգսյանն ասաց, որ Հայաստանի քաղաքացի գլխավոր քարտուղար ունենալն ինչքան խնդրի լուծում է, միաժամանակ կարող է խնդրի բարդացում լինել:

«Նիկոլայ Բորդյուժայի հայտարարությունը որպես Ռուսաստանի քաղաքացի գլխավոր քարտուղար  այլ քաշ, ընկալում ուներ, քան Հայաստանի քաղացաքի գլխավոր քարտուղարի որևէ պոտենցիալ հայտարարությունը: Հասկանալի է, որ  շատերի համար ընկալումը լինելու է՝  Հայաստանի քաղաքացի է, բա ինչ պետք է ասեր:  Թեև ինքը որպես Հայաստանի քաղաքացի չէ այդ պաշտոնում, միջազգային պաշտոնյա է, ունի իր սահմանափակումները, կարգավորումները, դիրքորոշում հայտնելու մեխանիզմները, երբ որ մինչև դիրքորոշում հայտնելը որոշակի համաձայնեցում է իրականացնում անդամ երկրների հետ»,- նշեց նախարարը:

Նրա խոսքով, շարունակելու են աշխատել ՀԱՊԿ ամրապնդման ուղղությամբ, իրականում  մեծ խնդիրներ լուծող կառույց է. «Մենք տեսնում ենք դրա ներուժը, շարունակելու ենք ամեն ինչ անել, որպեսզի ՀԱՊԿ-ում մեր անդամակցությունը լինի առավելագույն արդյունավետ և օգտակար»: