Ձեր վստահելի աղբյուրը

Վերաքննիչ քրեական դատարանը մերժեց Սամվել Բաբայանի փաստաբան Ավետիս Քալաշյանի բողոքը: Այդ մասին հայտարարել է՝ փաստաբանը: 

Հիշեցնենք, որ փաստաբանը դիմել էր Վերաքննիչ դատարան՝  բողոքարկելով Ս. Բաբայանի նկատմամբ երկամսյա կալանք կիրառելու մասին Երևանի Կենտրոն և Նորք- Մարաշ վարչական շրջանների ընդհանուր իրավասության դատարանի որոշումը:

Երևանի Կենտրոն և Նորք- Մարաշ վարչական շրջանների ընդհանուր իրավասության դատարանի որոշմամբ Սամվել Բաբայանը կալանավարվել է մարտի 24-ին: Նա ձերբակալվել է մարտի 22-ին:

ՀՀ Ազգային անվտանգության ծառայության հաղորդմամբ,  մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիրի բաղկացուցիչ մասեր տեղափոխելու փաստի առթիվ հարուցված քրեական գործի շրջանակներում այս պահին ձերբակալված են 3 անձ, այդ թվում՝ ՀՀ քաղաքացի Սամվել Բաբայանը.  «Կատարված քննչական գործողությունների և օպերատիվ-հետախուզական միջոցառումների արդյունքում ստացվել են նաև արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը և փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ և նրա պատվերով»։