Ձեր վստահելի աղբյուրը

Երևանի քաղաքապետի «Ելք» դաշինքի թեկնածու Նիկոլ Փաշինյանն այսօր թիմակիցների հետ քարոզարշավ է իրականացրել մայրաքաաղքի Ավան վարչական շրջանում։

Վերջինս, դիմելով ընտրողներին, նշել է. «Մենք եկել ենք ձեզ ասելու, որ Երևանը համակած հուսահատության գազելներից, մահվան վերելակներից, ցանց դարձած տանիքներից ելք կա։ Մայիսի 14-ին գնացեք ընտրատեղամասեր և դուխով քվեարկեք «Ելք» դաշինքի օգտին։ Շնորհակալ ենք այն քաղաքացիներին, ովքեր ԱԺ ընտրություններին քվեարկել են իրենց մտքի, խղճի և քաղաքական գիտակցության համաձայն՝ չտրվելով ընտրակաշառքային ճնշումներին»։

Երևանի քաղաքապետի թեկնածուն շեշտել է, որ այս ընտրություններին «Ելքը» մասնակացում է ոչ թե իր, այլ երևանցու շահերի հաղթանակն ապահովելու համար։ Նրա խոսքով,  ոչ մի դեպքում չպետք է հուսահատվել։

«Ապրիլի 2-ին Հայաստանում փոփոխությունների գործընթացը տեղից շարժվել է, և երևանցիները այդ գործընթացին կարող են նոր ուժ հաղորդել, որպեսզի փոփոխությունների գնացքը նոր հանգրվանի հասնի»,- նշել էՆիկոլ Փաշինյանը։

Ավելի ուշ լրագրողների հետ զրույցում Երևանի քաղաքապետի թեկնածուն ասել է, որ «Ելք» դաշինքի նախընտրական ծրագրով նախատեսվում է մինչև 2020 թվականը կառուցել մետրոյի առնվազն 1 կայարան, առաջիկա 5 տարիներին էականորեն մեծացնել ավտոբուսներով, տրոլեյբուսներով և մետրոյով ուղևորափոխադրումների ծավալը։

«Այսօր Երևանում 1 բնակչին բաժին ընկնող կանաչ տարածքների ծավալն էականորեն զիջում է միջազգային չափորոշիչներին։ Մենք նախատեսում ենք առաջիկա 5 տարում մայրաքաղաքում և նրա շրջակայքում տնկել 500 հազար ծառ՝ հիմնելով քաղաքային անտառի գաղափարը։

Բացի այդ՝ նախատեսում ենք Երևանում 5 լողավազան-լճակ ստեղծել, որտեղ ամռանը երեխաներն անվճար հիմունքներով կկարողանան լողալ։ Այլ խնդիր է երթևեկության նշանները տեսանելի վայրերում տեղադրելը, ինչպես նաև փողոցների հասցները անհրաժեշտ տեղերում փակցնելը։ Մեր թիմը պահանջկոտ է լինելու իր պաշտոնյաների նկատմամբ»,- հավաստիացրեց նա։