Ձեր վստահելի աղբյուրը

«Այսօր հայ զինվորն այնպիսինն է, ինչպիսին մեր պատմության մեջ արձանագրված է՝ Վարդանանց պատերազմից մինչև այսօր բոլոր փուլերում: Դրա վառ վկայություններից մեկն էլ ապրիլյան պատերազմն էր»,- Panorama.am-ի հետ զրույցում ասաց ՀՀ Զինված ուժերի գնդերեց  Նարեկ սարկավագ Պետրոսյանը:

Նրա խոսքով, հասարակության մեջ կարծիք կար, որ այժմյա սերունդը չի կռվի, սակայն ապրիլյան պատերազմը ցույց տվեց, որ հայ զինվորը գնալով ավելի ու ավելի մարտունակ զինվոր է դառնում:

«Այսօր ունենք կանոնավոր, գիտակից  բանակ: Զինված ուժերը կարողանում է ապահովել հայ զինվորի բազմաբնույթ զարգացումը: Շատ դեպքերում նույնիսկ ընտանիքում հայ զինվորը չի ստանում այն  հայրենասիրական, հոգևոր, ռազմական, մտավոր կրթությունը, ինչը ստանում է  բանակում, հատկապես  հայ սպայի  քրտնաջան աշխատանքի արդյունքում»,- ասաց Նարեկ սարկավագ Պետրոսյանը:

Նա նշեց, որ թե ռազմական գործողությունների ժամանակ, թե ամենուր հոգևորականն իր ժողովրդի, զինվորի կողքին է:

«Եթե տվյալ հոգևորականը նշանակված է ծառայության բանակում, ապա նա իր զինվորի կողքին, և ինչ անի իր զինվորը, եղբայրը, զավակը, նույնը պետք է անի հոգևորականը,  եթե պետք է նաև ոգևորել, եթե պետք է՝ դուք ինքդ  պաշտպանես»,- ասաց Նարեկ սարկավագ Պետրոսյանը:

Նշենք, որ ՀՀ Զինված ուժերի հոգևոր առաջնորդությունը մասնակցում է Երևանի Կ. Դեմիրճյանի անվան մարզահամերգային համալիրում բացված «Ազգ-բանակ» ռազմական ցուցահանդեսին: