Ձեր վստահելի աղբյուրը

ՀՀԿ-ն իրեն մրցակից է համարում  թե «Ելք» դաշինքին, թե «Երկիր ծիրանի» կուսակցությանը: Այս մասին այսօր Արաբկիր համայնքում լրագրողների հետ զրույցում ասաց Երևանի գործող քաղաքապետ, Երևանի ավագանու ընտրություններում  ՀՀԿ նախընտրական ցուցակը գլխավորող Տարոն Մարգարյանը:

«Մենք չենք թերագնահատում ոչ մեկին»,- նշեց քաղաքապետը:

Անդրադառնալով Զարուհի Փոստանջյանի հայտարարությանը, թե քաղաքապետի  հարստության 90 տոկոսը Երևան քաղաքի բյուջեի հաշվին է գոյացել, Տարոն Մարգարյանը նշեց, որ ինքն այդ մասին չի  լսել. «Անկեղծ ասած՝ չեմ լսել: Ես տեղյակ չեմ, թե ով ինչ  մեղադրանքներ է հնչեցնում: Ինչ վերաբերում է իմ կարողությանը, ապա 2000-ականներից սկսած  հայտարարագրում  նշել եմ իմ կարողությունների մասին: Թող վերցնեն ու ուսումնասիրեն»:

Հարցին, թե քաղաքապետն արդյոք այլ ուժերի նման պատրաստվում է ակտիվ քարոզությամբ  զբաղվել, մասնավորապես, հեծանիվ քշել, Տարոն Մարգարյանը պատասխանեց. «Հեծանիվ վարելն ակտիվ քարոզչությո՞ւն է, դա առողջ ապրելակերպ է: Ակտիվ քարոզչությունը հիմա է, որ ժողովրդի հետ շփվում ենք»:  

Խոսելով քաղաքի խնդիրների մասին, քաղաքապետը նշեց, որ վերջին չորս տարվա ընթացքում երևանցիները  տեսել են իր թիմի աշխատանքը, որն, ըստ նրա, օրուգիշեր աշխատել է: «Մենք չենք ասում, որ Երևանում խնդիրներ չկան, մեր ընդդիմախոսները տրանսպորտի կամ մի քանի խնդիրներից են խոսում,  իսկ ես կարող եմ բազմաթիվ խնդիրներից խոսել, որոնց մասին իրենք չգիտեն»,- ասաց Տարոն Մարգարյանը:

Քաղաքապետի խոսքերով՝ իրենք համարում են, որ այս տարիներին աշխատել են արդյունավետ, մաքսիմում կարողացել են իրենց ծրագիրն իրականացնել, բայց  դա չի նշանակում, որ այդ ծրագրի իրականացումով  Երևանը լինելու էր ամենազարգացած քաղաքը:

«Երևանը շնչում է և զարգանալու շատ տեղ ունի: Մեր հաջորդ՝ հինգ տարիների ծրագիրը  ներկայացրել ենք հանրությանը, որն «Ավելի լավ Երևան»-ի շարունակությունն է: Միշտ անելիքներ  լինելու են, կարևորը՝ քաղաքային իշխանությունը գոնե տեղյակ լինի այդ խնդիրների մասին, ինչպես նաև իմանա, թե ինչպես դրանք լուծեն»,- նշեց Տարոն Մարգարյանը:

Նրա խոսքերով՝ պետք չէ միայն վատը տեսնել. «Եկեք մի օր միայն լավը տեսնենք»:

Հարցին,  թե Երևանի ավագանիում ընտրվելու դեպքում՝ չի կարծում, որ իրեն լուրջ  փորձություն է իրեն սպասվում, հաշվի առնելով այն, որ այս անգամ քաղաքապետարանում կլինեն նաև ընդդիմադիր ուժերը, Տարոն Մարգարյանը պատասխանեց. «Եթե համագործակցեն, օգտակար կլինեն մեր քաղաքին, ինչի համար մենք շնորհակալ կլինենք»:

Դիտարկմանը, թե իրեն դժվար օրեր են սպասվում, Տարոն Մարգարյանը արձագանքեց. «Ես այդպես չեմ կարծում: Աշխատող մարդու համար միշտ էլ դժվար օրեր են, բայց աշխատանքում մենք դժվարություններից  չենք խուսափում»: