Ձեր վստահելի աղբյուրը

«Ես վստահ եմ, որ մենք որպես ազգ՝ կարող ենք լինել հաջող»: Անմար կրակի շուրջ ծաղիկներ դնելուց հետո Ծիծեռնակաբերդի բարձունքում լրագրողների հետ ճեպազրույցում ասաց  «Ավրորա» նախաձեռնության համահիմնադիր Ռուբեն Վարդանյանը:

«Ես վստահ եմ, որ մենք հաջողությամբ կարող ենք հաղթահարել բոլոր դժվարությունները, իսկ հաջողության համար պետք է միանան և Սփյուռքը, և Հայաստանը»,-ասաց նա:

Ռ. Վարդանյանի համոզմամբ, միայն գործ անելով կարելի է Հայաստանը դարձնել չքնաղ երկիր. «Մենք պետք է ցույց տանք մեր հարևաններին, որ իրենց ուզածը չի ստացվել: Մեր կյանքը շարունակվում է: Մենք մեր լուման դնում ենք աշխարհի զարգացման մեջ, ամեն ինչ անում ենք, որ աշխարհը, հիշելով 102 տարի առաջ տեղի ունեցածը, նայելով մեզ, հասկանա, որ 3 հազարամյա ազգը շատ բան է տվել ու տալիս աշխարհին»։

Հիշեցնենք, որ այսօր Երևանում «Ավրորա» նախաձեռնության համահիմնադիրներ Ռուբեն Վարդանյանը և Նուբար Աֆեյանը կներկայացնեն 2017թ. Ավրորա մրցանակի հավակնորդներին:

«Ավրորան մարդու արժեքների մասին է՝ համաշխարհային, համամարդկային արժեքների: Մենք պետք է նման արժեքների վրա հիմնված երկիր ստեղծենք»,-ասաց նա: