Ձեր վստահելի աղբյուրը

Ֆրանսիայի նախագահական ընտրություններում երկրորդ փուլ անցած «Ազգային  ճակատ» կուսակցության նախագահ Մարին Լե Պենն իր մրցակից «Առաջ» շարժման առաջնորդ Էմանուել Մակրոնին որակել է թուլակամ մարդ, ով չգիտի, թե ինչպես կարելի է լուծել ահաբեկչության խնդիրը:

«Այսօր ամենակարևոր թեման ահաբեկչությունն է: Ամենամեղմ բանը, որ կարող եմ այդ թեմայով ասել, այն է, որ Մակրոնը թուլակամ է»,-«Ռիա Նովոստի»  գործակալության փոխանցմամբ, ասել է նա:

Անդրադառնալով Մակրոնի հայտարարությանը, որ ինքը մտադիր է երկու ամսից դառնալ  հայրենասերների նախագահը, Մարին Լե Պենը հայտարարել է.

«Մակրոնը ոչ մի դեպքում հայրենասեր չէ: Նա հայրենասիրության նվազ նշաններ անգամ չի ցուցաբերել:  Նա բացարձակ հիստերիկ է, եվրոպական ինտեգրացիայի արմատական կողմնակից, նա կողմ է արտահայտվել ամբողջովին բաց սահմաններին, նա հայտարարում է, որ ֆրանսիական մշակույթ գոյություն չունի: Չկա մի ոլորտ, որտեղ նա հայրենասիրության մի կաթիլ ցույց տա»:

Ավելի վաղ կին թեկնածուն իր մրցակցի մասին ասել էր. «Ոչինչ չենք հասկանում, թե ինչ է ասում կամ ինչ է ուզում, բայց հենց հասկանում ենք, անհանգստանում ենք»: Դրան ի պատասխան Մակրոնն արձագանքել էր. «Հասկանում եմ՝ ինչ է ասում իմ մրցակիցը, և պայքարում եմ դրա դեմ, քանի որ դա օբյեկտիվորեն անհանգստացնում է»: