Ձեր վստահելի աղբյուրը

ԱԺ ընտրությունները վիճարկելու վերաբերյալ Կոնգրես-ՀԺԿ դաշինքի դիմումում ներկայացված փաստերից մեկի համաձայն, քվեարկության օրը նույն անձը նույն ժամին քվեարկել է երկու տեղամասում, որոնցից մեկը Երևանում է, մյուսը՝ Շիրակի մարզում: ՍԴ-ում ԱԺ ընտրությունները վիճարկելու վերաբերյալ Կոնգրես-ՀԺԿ դաշինքի քննության ժամանակ  ասաց պատասխանող կողմը՝ ԿԸՀ նախագահ Տիգրան Մուկուչյանը, ապա հարցադրում արեց. «Երկու բնակավայրի միջև տարբերությունը, հեռավորությունը 126 կմ է, քանի որ նույն մարդու մասին է խոսքը, ի՞նչ տրանսպորտային միջոցով է տեղաշարժվել»: 

Դաշիքնի ներկայացուցիչ, փաստաբան Տիգրան Եգորյանը պատասխանեց. «Գերձայնային ավտոմեքենայով»:

ՀԱԿ փոխնախագահ Լևոն Զուրաբյանը շարունակեց. «Նման հարց տալը, բնականաբար, չի հետապնդում ինչ-որ բան ճշտելու նպատակ: Այդ հարցն իրականում պնդում է, նշանակում է, որ այդ քաղաքացին չէր կարող լինել երկու տեղում միաժամանակ, ուստիև այս տեղեկությունը չի կարող համարվել հավաստի: Իրականում սա  պնդում է քողարկված հարցի շղարշի ներքո, ինչպես նաև տրված հարցերի մեծամասնությունը: Առաջարում եմ, բարձր դատարան, դադարեցնել այս պրակտիկան, որ փաստերը, պնդումները ներկայացնում են որպես հարց: Եթե պնդում ունեք, ասեք ձեր բացատրության ժամանակ, մենք դրանց կպատասխանենք մեր ամփոփիչ ելույթում: Իսկ այսպես անդադար փորձ է արվում պատասխանող կողմի կողմից ներկայացնել առանձին դրվագներ, պնդումներ որպես հարցեր»»:

Նշենք, որ Սահմանադրական դատարանում Կոնգրես-ՀԺԿ դաշինքի դիմումի քննությունը կշարունակվի վաղը: