Ձեր վստահելի աղբյուրը

Հայ սուսերամարտիկներն օրեր առաջ Բելառուսում մասնակցել են Մ 23 տարեկանների Եվրոպայի առաջնությանը: Էդուարդ Օվիկյանը (խոցասուսեր) չէր կարողացել հաղթահարել որակավորման փուլը, իսկ Էմմա Պողոսովան (խոցասուսեր)  և Մայքլ Հովհաննիսյանը (ճկասուսեր)  պարտվել էին լավագույն 32-ի համար պայքարում:

Հայաստանի սուսերամարտի ֆեդերացիայի գլխավոր քարտուղար Արտաշես Մադոյանը ՀԱՕԿ լրատվականի հետ զրույցում  նշել է, որ առաջնությունը շատ ուժեղ էր եև  բոլոր թիմերը ներկայացել էին մարտական կազմերով:

«Մեր մարզիկները շատ ուժեղ խմբերում էին հայտնվել: Մինչև Եվրոպայի առաջնությունը մյուս սուսերամարտիկները մասնակցել էին այդ տարիքային խմբի Եվրոպայի գավաթի խաղարկության փուլերին, որտեղ միավորներ էին ձեռք բերել: Իսկ  մերոնք` ոչ: Այդ պատճառով վիճակահանությունը նրանց ուժեղների դեմ էր դուրս բերել: Ամեն դեպքում մեր սուսերամարտիկների ելույթներից գոհ չեմ: Ավելին էի ակնկալում»,-ասել է նա:

Մադոյանի խոսքով, երիտասարդների աշխարհի առաջնությունից հետո մմարզիկները չէին  հասցրել որևէ մրցաշարի մասնակցել կամ հավաք անցկացնել:

«Տեղում մարզումներից հետո միանգամից գնացինք Եվրոպայի առաջնություն: Դա էլ իր ազդեցությունն ունեցավ»,-ասել է ֆեդերացիայի գլխավոր քարտուղարը:

Արտաշես Մադոյանը հայտնել է, որ այսօր` Եվրոպայի առաջնության վերջին օրը, ընդունող երկիրը դրոշը կփոխանցի Հայաստանի սուսերամարտի ֆեդերացիայի նախագահ Արմեն Գրիգորյանին:  2018 թ. այդ տարիքային խմբի աշխարհամասի առաջնությունն անցկացվելու է Հայաստանում: