Ձեր վստահելի աղբյուրը

Ապրիլի 2-ի ԱԺ ընտրություններում «Ելք» դաշինքի գրանցած փոքր հաջողությունը տեղից շարժեց դրական փոփոխությունների անիվը։ Մայիսի 14-ին էլ երևանցին հնարավորություն ունի քվեարկելու դաշինքի օգտին՝ նոր թափ հաղորդելով փոփոխությունների գործընթացին։ Այսօր Նոր Նորք վարչական շրջանում քարոզարշավ իրականացնելիս այս մասին ասաց Երևանի քաղաքապետի թեկնածու Նիկոլ Փաշինյանը։

«Մենք ձեզ առաջարկում ենք Երևանի կոռումպացված իշխանությունը փոխարինել արդյունավետ և հաշվետու իշխանությամբ։ Մայիսի 14-ին գլուխներդ բարձր, դուխով քվեարկեք «Ելք»-ի օգտին, որովհետև հուսահատության գազելներից և մահվան վերելակներից, աղբի և փոշու ամպերից ելք կա»,- ասաց նա։

«Ելք» դաշինքի ավագանու թեկնածու Անի Սամսոնյանն էլ իր հերթին նշեց, որ «Ելք»-ը պատրաստ է ստանձնել քաղաքային իշխանությունը։

«Մենք գալիս ենք փոխելու այն վերելակները, որոնցից ամեն օր վախենալով եք օգտվում, մենք գալիս ենք ձեզ վերադարձնելու կանաչ պուրակները։ Մեր երեխաներին այլևս չեն հերթագրելու՝ մանկապարտեզ ընդունելու համար, դպրոցականներից խելքից դուրս գումարներ չեն հավաքելու։ Դուք ընտրում եք, մենք փոխում ենք»,- ասաց նա։

Դաշինքից պատգամավոր ընտրված Մանե Թանդիլյանն էլ իր հերթին նշեց, որ «Ելք»-ի թիմը պատրաստ է և կարող է բարձրացնել յուրաքանչյուր հարթակում։