Ձեր վստահելի աղբյուրը

Պաշտոնական այցով Երևան ժամանած Հնդկաստանի փոխնախագահ Մոհամմադ Համիդ Անսարին այսօր այցելեց Հայոց ցեղասպանության զոհերին հիշատակին նվիրված հուշահամալիր, որտեղ հարգանքի տուրք մատուցեց  Մեծ Եղեռնի զոհերի հիշատակին և ծաղկեպսակ դրեց անմար կրակի մոտ:

Հնդկաստանի փոխնախագահին ուղեկցում էր ՀՀ արտաքին գործերի նախարար Էդվարդ Նալբանդյանը:

Հայոց ցեղասպանության թանգարան-ինստիտուտ այցելելու ճանապարհին Մոհամմադ Համիդ Անսարին նկատեց հուշահամալիր այցելող փոքրիկ տղային, բռնեց երեխայի ձեռքն ու դիմելով Նալբանդյանին՝ ասաց. «Ահա սա է կյանքի ոգին»։

Այնուհետև թանգարանում բարձրաստիճան հյուրը ծանոթացավ Ցեղասպանության պատմությանը, գրառում կատարեց պատվավոր հյուրերի հուշամատյանում։

«Այս հուշակոթողը հանդիսավոր վկայությունն է այն հայերի, ովքեր ենթարկվել են ծանր բռնությունների: Բռնությունների բացակայության, հանդուրժողականության և ճանաչման շնորհիվ միայն մենք կարող ենք խաղաղ և ներդաշնակ ապագա կառուցել»,-գրել է Անսարին:

Հնդկաստանի փոխնախագահի այցը Ծիծեռնակաբերդում ավարտվեց Հիշողության պուրակում ծառատունկով։