Ձեր վստահելի աղբյուրը

Կոնգրես-ՀԺԿ դաշինքը Սահմանադրական դատարանից որևէ ակնկալիք չունի, վստահ է, թե ինչ որոշում է կայացնելու:

«Միամիտ չենք»,- լրագրողների հետ զրույցում ասաց դաշինքի անդամ, ՀԱԿ փոխնախագահ Լևոն Զուրաբյանը:

Հիշեցնենք, որ ՍԴ-ում ընթանում է ԱԺ ընտրությունները վիճարկելու վերաբերյալ Կոնգրես-ՀԺԿ դաշինքի դիմումի քննությունը:

Նա նշեց, որ Սահմանադրական դատարան դիմել են երկու նպատակով:

«Նախ և առաջ մեր պարտավորությունն է: Իրավունք ունե՞նք թաքցնել ժողովրդից, հանրությունից ճշմարտությունը, եթե մենք ունենք փաստարկներ: Ունեցել ենք տեսախցիկներ, ունենք բազմաթիվ տեսանյութեր, որոնք ապացուցում են հանցագործության ծավալը, համատարած լինելը, համակագային լինելը»,- ասաց նա, ապա հավելեց, որ ներքին դատական ատյանները սպառելուց հետո դիմելու են Մարդու իրավունքների եվրոպական դատարան: 

Նրա խոսքով, այս ընտրությունները մյուսներից տարբերվել է նրանով, որ տեղամասերում աշխատել են նվազագույնի հասցնել խախտումները, քանի որ տեսախցիկներ են տեղադրված եղել տեղամասերում, նաև  ստորագրված ցուցակները էին հրապարակվելու:

«Անցյալում շատ դեպքերում ուղղակի եթե ընտրակաշառքն իր գործը չէր անում, բազմակի քվեարկությունն իր գործը չէր անում, դիմում էին արձանագրությունների կեղծմանը: Այս պահին նման բաներ չունենք: Քանի որ ընտրատեղամասերում նվազեցվել էր ընտրակեղծիքի հնարավորությունը,  հարվածը գնացել էր ընտրողին հարկադիր, հրահանգավորված քվեարկության ուղղությամբ տանելուն, որը նույնպես հանցագործություն է: Այսինքն ավելի շատ ընտրախախտումների  ծանրությունը եղել է ընտրակաշառքի, ահաբեկման, հարկադրելու ուղղությամբ»,- ասաց Լ. Զուրաբյանը:

Նա նշեց, որ անգամ եթե կաշառում են, ահաբեկում են, հարցը չի լուծվում, պետք է երրորդ կարևոր էլեմենտը՝ քվեարկության վերահսկումը. «Դրա համար պետք է  գնային  քվեարկության գաղտնիության  խախտմանը, ինչն էլ կատարվել է, ֆիքսվել է տեսախցիկներով: Մենք ներկայացրել ենք Սահմանադրական դատարան բոլոր փաստերը: Մենք միջնորդել ենք ստեղծել հատուկ խումբ, որ երեք օրում բոլոր տեսանյութերը նայեն, հայտնաբերեն գաղտնիության քվեարկության խախտման բոլոր դրվագները»: 

Լ. Զուրաբյանի խոսքով, ընտրություններում իրենց դաշինքի՝ քիչ թվով ձայներ ստանալու հիմնական պատճառը  հենց այն է, որ ժողովրդի ազատ կամքի ձևավորման և արտահայտման հնարավարություն չկար։