Ձեր վստահելի աղբյուրը

«Ելք» դաշինքը գոհ և ոգևորված է նախընտրական քարոզարշավի ընթացքից։ Լուրջ խոչընդոտներ, բացի հայտնի միջադեպից, մինչ այժմ չեն հանդիպել, ավելին, Երևանի բոլոր վարչական շրջանների բնակիչները բավական ջերմ են դիմավորում ելքականներին։ Panorama.am-ի թղթակցի հետ զրույցում այս մասին ասաց դաշինքի ավագանու թեկնածու Անի Սամսոնյանը։

«Մեր հասցեին պատուհաններից, երևանյան բակերից ու փողոցներից լսվող խոսքերն ապացուցում են, որ «Ելք»-ի քարոզարշավի ռազմավարությունը և կարգախոսը ճիշտ են ընտրված։ Մենք մարդկանց մոտ դրական զգացողություններ և ընտրությունների նկատմամբ տրամադրվածություն ենք առաջացնում։ Երևանցիները զգում են, որ մեզ հետ կարելի է հույս կապել, որ մենք կարող ենք որոշակի փոփոխություններ բերել»,- ասաց նա։

Անի Սամսոնյանի խոսքով, քիչ չեն մարդիկ, որոնք չեն հավատում փոփոխություններին։ Վերջիններիս «Ելք»-ի ներկայացուցիչները ժամանակ են տրամադրում, զրուցում նրանց հետ՝ փորձելով համոզել, որ եկել է իրական փոփոխությունների ժամանակը։ «Բացի Կենտրոն վարչական շրջանից, որտեղ վիճակը քիչ թե շատ բարվոք է, Երևանի արվարձաններում առկա են բազմաթիվ լուրջ խնդիրներ՝ թե աղբի կուտակման, թե վթարային շենքերի մասով։ Մենք տեսնում ենք, որ քաղաքը շատ անհավասարաչափ է զարգացած»,- նշեց մեր զրուցակիցը։

Նախընտրական քարոզարշավի ընթացքից գոհ է նաև «Երկիր ծիրանի» կուսակցությունը։ Ինչպես նշեց կուսակցության մամուլի պատասխանատուն է Սոնա Աղեկյանը, մարդիկ քաղաքապետի թեկնածու Զարուհի Փոստանջյանին դիմավորել են առանձնակի ջերմությամբ։ «Երևանցիները մեզ են ներկայացնում իրենց հուզող բազմաթիվ հարցեր, դժգոհում են հիմնականում քաղաքային տրանսպորտից և գործազրկությունից։ 3 ընտրողից 2-ը հաստատ բարձրացնում է հասարակական տրանսպորտի հարցը։ Մարդիկ ուզում են աշխատանք ունենալ, ասում են, որ չեն ուզում Հայաստանից արտագաղթել»,- նշեց մեր զրուցակիցը։

Սոնա  Աղեկյանը նկատեց, որ մայրաքաղաքի բնակիչների չնչին հատվածն ամբողջական պատկերացում ունի ավագանու կառուցվածքից և աշխատաոճից, մարդիկ ավելի շատ կենտրոնացած են քաղաքապետի պաշտոնի վրա։

Ինչ վերաբերում է ՀՀԿ-ին, ապա ավագանու թեկնածու Նաիրա Նահապետյանը տեղեկացրեց, որ Տարոն Մարգարյանի և երևանցիների հանդիպումն անցնում է ջերմ մթնոլորտում։ «Մարդիկ ներկայացնում են իրենց հուզող հարցերը՝ հիմնականում տրանսպորտի և վերելակների վատ վիճակի հետ կապված։ Մենք մեր հերթին նշում ենք, որ արդեն օգոստոսին կմեկնարկի Երևան քաղաքի տրանսպորտային ցանցի արդիականացման ծրագիրը՝ շարժակազմի փոփոխություն, սոցիալական անապահով խմբերի և ուսանողների համար նախատեսվող զեղչային համակարգ, միասնական տոմսի ներդրում և այլն։

Ինչ վերաբերում է վերելակների վիճակին, ապա նախատեսվում է արդիականցնել նաև այս ցանցը Սակայն մեկ բան է հին վերելակները նորերով փոխարինելը, այլ բան՝ սպասարկող ընկերություն գտնելը։ Այս պահին լուծումները գտնված են, սկսվելէ  գույքագրման գործընթաց»,- ասաց նա։