Ձեր վստահելի աղբյուրը

Սահմանադրականում դատարանում շարունակվում է ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննությունը: Դիմող կողմը հարցեր է ուղղում պատասխանող կողմին:Դաշինքի անդամ, ՀԱԿ փոխնախագահ Լևոն Զուրաբյանը նախ` հետաքրքրվեց Կենտրոնական ընտրական հանձնաժողովի նախագահ Տիգրան Մուկուչյանից, ով հանդես է գալիս պատասխանող կողմ, արդյո՞ք ծանոթ է  ընտրություններին դիտորդական առաքելություն իրականացրած ԵԱՀԿ/ԺՀՄԳ-ի միջանկյալ զեկույցին:

Տիգրան Մուկուչյանը պատասխանեց, որ  ծանոթ է, կարդացել է:

Լ. Զուրաբյանը հարցրեց. «Այնտեղ նշված է, որ ընտրությունները ստվերվել են ընտրակաշառքի, քաղծառայողների, մասնավոր ընկերությունների վրա ճնշումների մասին արժանահավատ տեղեկություններով:  Ինչո՞ւ են նման եզրահանգման եկել:  Դուք ունե՞ք նման արժանահավատ տեղեկություններ»:

ԿԸՀ նախագահը ասաց, որ նրանցից պետք է հարցնել, թե ինչու են նման եզրահանգման եկել, ապա հավելեց.  «Արժանահավատ համարում ենք այն, ինչի վերաբերյալ կան ապացույցներ, փաստարկներ, այլոցից լսվածը չենք համարում արժանահավատ»:

ՀԱԿ փոխնախագահը նաև հետաքրքրվեց, թե 1500 տեղամասում տեղադրված տեսախցիկներն արդյո՞ք նպաստել են քվեարկության օրինականության պահպանմանը:

Տ. Մուկուչյանն ասաց, որ կարևոր նշանակություն ունեցան լիակատար թափանցիկություն ապահովելու առումով:

«Իսկ եթե ակնկալում եք դրա վերաբերյալ շնորհակալություն, պատրաստվում եմ անել եզրափակիչ խոսքում»,- ասաց ԿԸՀ նախագահը:

Լ. Զուրաբյանն արձագանքեց. «Ինձ կյանքում ամենաքիչը պետք է ձեր շնորհակալությունը»:

Նա նաև հարցրեց՝ հետաքրքրվել եք, թե ինչո՞ւ է ժամը 7:00-11:00-ը խափանվել ինտերնետային հեռարձակումը: Տ. Մուկուչյանն ասաց, որ գերծանրաբեռնվածության արդյունքում:

Լ. Զուրաբյանը  հարց բարձրացրեց նաև քվեարկության մասնակցած քաղաքացիների թվի հետ կապված, նշելով, որ նախորդ ընտրությունների համեմատ նրանց թիվն աճել է, մինչդեռ ավելի շատ մարդիկ են գնացել երկրից,  ինչո՞վ եք բացատրում:

Տիգրան Մուկուչյանն ասաց. «Քվեարկության մասնակցիների թվով, հրապարկված է ցուցակը կայքում: Հրապարակված ցուցակն ակտիվ մասնակցության լիակատար փաստն է ապացուցում: Ընդամենը մեկ դիմում ենք ստացել: Դժվար է գտնել նախադեպ, որ անձնական տվյալները հրապարավեն, բայց մենք հրապարակեցինք»: