Ձեր վստահելի աղբյուրը

Սահմանադրական դատարանում ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննությանը ՍԴ անդամ Կիմ Բալայանը  հարցով դիմեց  Կենտրոնական ընտրական հանձնաժողովի նախագահ Տիգրան Մուկուչյանին, ով հանդես է գալիս պատասխանող կողմ` ինչ-որ բան կա՞, որ Ընտրական օրենսգրքով խանգարում է  ԿԸՀ-ին նաև վերահսկողական ֆունկցիան ավելի ուժեղ կատարել, ինչպես կատարում եք կազմակերպական ֆունկցիան:

ԿԸՀ նախագահն ասաց. «Անդրադառնամ ԿԸՀ լիազորություններին՝ կապված տեղամասային հանձնաժողովների անդամների կողմից պարտականությունների պատշաճ կատարման հետ, hանձնաժողովներում նշանակումներ կատարվում են կուսակցությունների կողմից, սակայն դրանից հետո նույնիսկ այդ անձինք չեն գալիս առաջին նիստերին, այդ անձիք  չեն մասնակցում դասընթացներին։ Հիմնականում դասընթացներին մասնակցության բացակայությունը հանդիպում է խորհրդարանական ընդդիմություն ներկայացնող կուսակցությունների դեպքում և ներազդման որևէ լծակ չկա, որպեսզի նշված պայմաններում կիրառվեն ինչ-ինչ  պատասխանատվություն, դադարեցվեն լիազորությունները:  Հաճախ տեղամասային ընտրական հանձնաժողովում նախագահի պաշտոնների նշանակուման դեպքեր ենք ունենում, երբ ուղղակի տվյալ անձին նշանակած են լինում՝ հաշվի առնելով, որ վերջինս գալու է և ստանալու աշխատավարձ: Հաճախ ունենում ենք քարտուղարներ, ովքեր բողոքում է տեսողությունից, որ չեն  կարող իրականացնել գրանցամատյանի վարում  և այլն»:

Նա նշեց, որ թերևս օրենսդրության կատարելագործման անհրաժեշտության կա այս առումով:

ՍԴ անդամ Ֆելիքս Թոխյանը հարցրեց, թե լրացուցիչ ի՞նչ օրենսդրական բազա է պետք, որ մարդկանց հավատն ամբողջովին վերականգնվի ընտրությունների նկատմամբ, Տ. Մուկուչյանը պատասխանեց, որ թափանցիկության ապահովման առումով օրենսդրական լիարժեք հնարավորությունը տրված է:

«Հավատի վերականգնման առումով բոլորի մոտ, երևի թե, պետք է, ըստ էության, դոմինանտ լինի մի քիչ ազնվությունը, երբ իրականում 99 տոկոս աշխատած սարքերի պարագայում կուրախանան դրանով, ոչ թե չարախնդան մի տոկոսի չաշխատելու համար: Ազնիվ  ներկայացվի արվածը,  ուր ենք հասել և ուր ենք ուզում գնալ։ Կարծում եմ՝ սա է պակասում»,- ասաց ԿԸՀ նախագահը: